ЯҢАЛЫКЛАР

2022 елның 1 һәм 2 мартында 19.00 сәгатьтә Г.Камал исемендәге татар дәүләт академия театры сәхнәсендә “Казан” бию ансамбленең 25 еллык юбилеена багышланган концертлар була.

Юбилей концертлары кысаларында ансамбльнең иҗат коллективы яңа программа - "Голливуд" бию-җыр тамашасын тәкъдим итәчәк.

Программада Американың хореография һәм музыка культурасының иң кызыклы мизгелләре тупланган. Телсез киноның беренче кадрларыннан алып Дисней мультфильмнарының тылсымлы әкиятләренә кадәр барысы да бар. Бөек комик Чарли Чаплин, онытылмаслык Мерилин Монро һәм Элвис Пресли стэп биюен "Tapdogs" бродвей стилендә тәкъдим итәчәк. Артистларның искиткеч костюмнары, дәртле музыка, тизлекле биюләре беркемне дә битараф калдырмаячак.

Гомуми сәнгать сюжеты белән берләштерелгән бербөтен хореографик спектакльләр булдыру идеясенә нигезләнеп, «Казан хәзинәләре», «Бөек ефәк юлы», «Зәңгәр шәл» музыкаль-хореографик спектакльләр оештырылды. Алар Россиянең төрле шәһәрләрендә һәм чит илләрдә тамашачыларны яуладылар, ә һәр чыгыш искитмәле уңыш һәм алкышлар белән уза.

23 февраль көнне Татарстан Республикасы Милли музее Казан халкын һәм кунакларны Ватанны саклаучылар көненә багышланган патриотик бәйрәм программасына чакыра.

Быел чаралар берьюлы ике мәйданчыкта узачак, ә аларны бердәм комплекслы билет алып карарга мөмкин!

1941-1945 еллардагы Бөек Ватан сугышы музей-мемориалына килүчеләр хәрби әзерлектә катнашачак, күргәзмәдәге Икенче бөтендөнья сугышы чорындагы кораллар белән танышачаклар, Кызыл армия солдаты формасында фотога төшәчәкләр.

Татарстан Республикасы Милли музеенда кыюлар ук һәм балта ярдәмендә үзләренең осталыкларын тикшерәчәкләр, Наполеон чорындагы хәрби әзерлекләрен үзләштерәчәкләр, Бөек Ватан сугышы вакытындагы автоматны һәм башка бик күп җиһазларны җыячаклар һәм якыннан өйрәнәчәкләр.

Тулырак мәгълүмат алу өчен телефоннар: +7 (843) 5678044, +7 (843) 5900050

2022 елның 19 февралендә Түбән Кама шәһәренең Халык иҗаты йортында “Халкыбыз хәзинәсе” татар мәдәнияте фестивале узды. Чара Россиядә Халыкларның мәдәни мирасы елы кысаларында оештырылды.

Халык иҗаты бәйрәме бу елның үзенчәлекле бер ачылышы булды, аның дәвамы буларак Түбән Камада төрле халыклар мәдәниятенең берничә фестивален үткәрү планлаштырыла.

Бәйрәм Түбән Кама районының авыл җирлекләре мәдәният йортлары, төрле җәмгыять вәкилләрен халык иҗаты йорты мәйданчыгында берләштерде. Алар концерт чыгышларын гына түгел, татар халкының декоратив-гамәли сәнгате күргәзмәсен дә, аның гореф-гадәтләрен һәм йолаларын да тәкъдим иттеләр.

Тәмле ризыклар, традицион татар ашлары - чәк-чәк, катык, хуш исле өчпочмаклар кунакларның берсен дә битараф калдырмады.

Концертның бай программасы бәйрәмнең дәвамына әверелеп Түбән Каманың иҗат коллективларын берләштерде һәм Түбән Кама халкы өчен чын бүләк булды.

Татарстанның  Алабуга һәм Яшел Үзән шәһәрләрендә 2022 елда ике мәдәни үсеш үзәге ачылачак. Мәдәният үзәкләрен төзү узган ел "Мәдәният" милли проекты кысаларында башланган иде. Алабугада үзәк 197 урынга исәпләнгән, Яшел Үзәндә – 199 урынлы мәдәни үзәк булачак.

Узган ел Татарстанда милли проект буенча өч мәдәният йорты төзелде. Аларның икесе - Кукмара районында, берсе Минзәләдә. Һәркайсы 100 урынга исәпләнгән.

Искәртеп узабыз, милли проект кысаларында узган ел Казанның Киров районында урнашкан ике сәнгать мәктәбе (2нче музыка мәктәбе һәм 10нчы сәнгать мәктәбе) төзекләндерелде.

Шулай ук авылларда мәдәният учреждениеләренә дә ярдәм бирелде (83 учреждение һәм авыл җирлекләре территориясендә урнашкан 75 муниципаль мәдәният учреждениесе хезмәткәре).

Моннан тыш, Яр Чаллы, Азнакай, Бөгелмә, Югары Ослан, Чүпрәле, Зәй, Түбән Кама, Яңа Чишмә, Норлат районнарыннан ун иҗат коллективы 1,7 млн сумлык грант алды.

Халыкара туган тел көне кысаларында социаль челтәрләрдә зур онлайн-акция уза.
Милли киемнәр кигән катнашучылар туган телләрендә шигырьләр (яисә проза) укыячаклар.
Йомгаклау видеороликлары социаль челтәр битләрендә #ТатарстанГоворитНаРодном #ВолонтерыКультурыРТ хэштеглары белән басылачак.

«Мәдәният» милли проектының «Иҗади кешеләр» федераль проекты «Мәдәният волонтерлары» программасы кысаларында ирекле (волонтер) коммерциячел булмаган оешмаларга грантлар бирү конкурсы игълан ителә.

19 февраль 17.00 сәгатьтә Е.А.Боратынский музеенда «Записки с севера» концерт программасын тәкъдим итәчәкләр, анда көнбатыш романслары һәм арияләр яңгыраячак.

Мальвина Майсурадзе Казанда туып үскән. Казанның 16нчы номерлы гимназиясен тәмамлаганнан соң, Лондонда укыган. Нигездә 19 һәм 20 гасырлардагы драма репертуарын башкара.

Пианист Екатерина Зарифова.

Салих Сәйдәшев исемендәге ДЗКЗ Нәҗип Җиһанов исемендәге «Мирас» VII татар музыкасы фестивале тәмамланды.

Фестиваль 9-16 февральдә узды. Бу вакыт аралыгында 3 концерт оештырылды.

Концерт-ачылыш күренекле татар композиторы Мансур Мозаффаровның тууына 120 ел тулуга багышланды.

Икенче фестиваль кичәсе, 12 февраль Идел Болгар дәүләтендә ислам динен кабул итүнең 1100 еллыгына багышланган иде.

Өченче фестиваль кичәсе  Россия композиторлар берлеге идарәсе рәисе, Татарстан Республикасы Композиторлар берлеге рәисе, Россия һәм Татарстан Республикасының халык артисты Рәшит Кәлимуллинның 65 еллыгына багышланды. 

"Пушкин картасы" программасы башланганнан бирле 2021 елның 1 сентябреннән алып әлеге программа буенча Чаллыда 21 меңнән артык билет сатып алынган.

Бүгенге көндә бу проектта Чаллының 23 мәдәният, яшьләр һәм мәгариф учреждениесе катнаша.

«Пушкин картасы» буенча «Болгар» бию театрында, картиналар галереясендә, курчак театрында, «Энергетик» мәдәният сараенда, туган якны өйрәнү музеенда, «Визит» джаз оркестрында, Сара Садыйкованың концертлар залында, Аяз Гыйләҗевның драма театрында, «Мастеровые» рус драма театрында, органик залда,  Игорь Лерман камера оркестрында, «Нур», «Шатлык» яшьләр үзәкләрендә мәдәни чаралар карарга мөмкин.

22-24 апрель Мәскәүдә «Ачык мәдәният» форумы узачак. Мәдәният өлкәсендә эшләүче җитәкчеләр һәм белгечләр форумда бушлай катнашу өчен "Пәнҗешәмбе"("Четверг") фонды конкурсына гариза бирә ала. Бу хакта оешманың директоры Дарья Дмитриева хәбәр итә.

Ул хәбәр иткәнчә конкурста түләүсез катнашудан тыш, җиңүчеләргә Мәскәүдә яшәү һәм туклану өчен дә түләячәкләр.

«Форумның темалары: аудиторияне җәлеп итү, мәдәният өлкәсендәге трендлар, инклюзия, цифрлы дөнья, мәдәни волонтерлык, мәдәни өлкәне үстерү перспективалары һәм башкалар», - диелә.

Конкурс турында тулырак белергә һәм аңа сылтама буенча кушылырга мөмкин.

«Ачык мәдәният» форумы Президент мәдәни инициативалар фонды ярдәме белән оештырыла.

Президент мәдәни инициативалар фонды 2021 елда Россия Президенты Владимир Путин указы буенча оештырылды.