Казан Кремлендә «Терелгән легендалар һәм хикәяләр» театр фестивале уза

2025 елның 11 июле, җомга

11 июльдән 13 июльгә кадәр «Казан Кремле» Музей-тыюлыгы традицияләр һәм сәнгать белән тулы мәйданчыкка әвереләчәк. 3 көн, 20 тамаша, Мәскәү, Санкт-Петербург, Казан, Уфа, Воронеж һәм башка шәһәрләрдән коллективлар, аларның һәркайсы үзенең уникаль әкият, риваять һәм миф интерпретациясен тәкъдим итәчәк. Дүрт спектакль инвалидлар өчен җайлаштырылачак һәм рус ишарәләр теленә тәрҗемә һәм тифлокомментарийлар белән узачак.

Фестиваль Сибурның «Яхшы эшләр формуласы» социаль инвестицияләр программасы ярдәмендә оештырылган. Проект компания эшли торган төбәкләрдә уңайлы мохит булдыру өчен мөһим корал булып тора. Урамдагы театр куелышлары Казан кунакларына һәм халкына театр сихерләре белән тулган онытылмас хисләр бүләк итәчәк.