Бүген Муса Җәлил исемендәге Татар академия опера һәм балет театрында 73 нче сезон ябыла

20 июльдә «Турандот» операсының концерт версиясе белән Муса Җәлил исемендәге Татар академия опера һәм балет театры үзенең 73 сезонын яба.
Спектакльдә Украина Милли операсы солистлары Оксана Крамарева (Турандот) һәм Сергей Ковнир (Тимур), Мария театры солисты Әхмәт Агади (Калаф), Сишенг И (Лю) һ.б. катнаша. Хормейстеры – Любовь Дразнина, дирижеры - Ренат Салаватов.
298 көн эчендә (2011 елның 20 сентябрендә ачылган сезон нәкъ шуның кадәр дәвам итте) театрның опера һәм балет труппалары тулаем алганда 256 спектакль күрсәтте. Шуларның 110-ы Казанда булды. Чит илләрдә – Голландия, Франция, Австрия, Бельгия, Норвегия, Дания, Швейцария шәһәрләрендә 114 спектакль узды. Болар: «Аида», «Тылсымлы флейта», «Набукко», «Аккош күле», «Кирәксез саклану», «Щелкунчик», «Йокыга талган гүзәл» спектакльләре, «Опера төне» гала-концерты.
2 спектакль Россия шәһәрләрендә күрсәтелде: «Лючия ди Ламмермур» операсы «Алтын битлек» фестивале кысаларында Россиянең Зур Театры сәхнәсендә (Мәскәү), «Шүрәле» балеты Чабаксарда күрсәтелде.
Сезон премьералары – “Җәлил” операсы (“Ел вакыйгасы” номинациясендә “Тантана” премиясе алды); «Евгений Онегин» операсы, «Аккош күле» балеты зур уңыш казанды.
Сезон дәвамында труппа солистлары зур бүләкләргә лаек булды: Альбина Шаһиморатова «Алтын битлек» премиясе алды; балет солистлары Михаил Тимаев «Яшь йолдыз» номинациясендә «Бию рухы» премиясенә лаек булды; биючеләр Давид Залеев, Кристина Андреева һәм Олег Ивенко Пермь һәм Сочи шәһәрләрендә узган халыкара конкурслар лауреатлары булдылар; театрның педагог-репетиторы Валентина Прокоповага Татарстанның Халык артисты дигән мактаулы исем бирелде.
Бу сезонда опера театрында 99 789 тамашачы спектакльләр карады, зал ел әйләнәсендә уртача алганда 95 процентка тулы булды. Театр 42 миллион 833 мең 975 сум (узган елдагыга караганда 15% диярлек күбрәк) акча эшләде.
Яңа 74-нче сезон 23 сентябрьдә «Турандот» опера премьерасы белән ачылачак (тулы сәхнә версиясе, режиссеры-сәхнәгә куючысы - Михаил Панджавидзе). Сентябрь спектакленә билетлар кассаларда сатыла башлады инде.