Австриядә «Кавалерист кыз» операсы премьерасы булды

14 гыйнварда Австриянең Зальцбург шәһәрендә «Кавалерист кыз» операсының күптәннән көтелгән премьерасы булды, аны сәхнәгә кую белән Моцартеум университеты шөгыльләнде.
Татарстан Республикасыннан килгән делегация премьераны карады. Зальцбургта булган өч көндә кунаклар шәһәрнең истәлекле урыннары белән таныштылар, опера авторлары белән очрашулар уздырдылар, шәһәр музейларында булдылар. Беренче Бөтендөнья сугышында һәлак булган 15 000 тирәсе рус, серблы һәм италияле хәрби әсир күмелгән Грёдиг шәһәре зиратында венок кую тантанасы аеруча истәлекле булды.
Моцартеум университеты сәхнәсендә «Кавалерист кыз» операсы премьерасы чараның иң мөһим вакыйгасы булды. Дүрт актка бүлеп Надежда Дурова тәрҗемәи хәленең иң әһәмиятле чорлары күрсәтелде: ата-ана йортындагы тормышы, император Александр I белән очрашуы һәм Бородино сугышында катнашуы, А.С. Пушкин белән танышуы һәм әдәби эшчәнлеге, Алабугага кайтуы. Тамаша Марианна Фигл либреттосы һәм арткы планда хор катнашу нәтиҗәсендә җиңел аңлашыла. Австрияле тамашачылар спектакль караудан туган соклану хисләрен белдерде.
Премьераны караучылар, шулай ук Татарстан делегациясе әгъзалары фикеренчә, опера Бородино сугышының һәм 1812 ел Ватан сугышында җиңүнең 200 еллыгын бәйрәм итү кысаларында уздырылырга лаеклы чара булып тора.
Татарстан Республикасы Мәдәният министрлыгының Матбугат хезмәте