Е.А. Боратынский музеенда Иске Казанны сөючеләр клубы утырышы булачак

25 ноябрьдә 16.00 сәгатьтә Е.А. Боратынский музеенда “АК ЮЛ, ЯИСӘ РУС ОДИССЕЯСЕ” ( «БЕЛЫЙ ПУТЬ, ИЛИ РУССКАЯ ОДИССЕЯ») музей проекты кысаларында Иске Казанны сөючеләр клубының Гражданнар сугышы чорына һәм шәһәребез кешеләре – Ак армиянең 1918 ел көзендә көнчыгышка таба чигенүендә катнашучылар язмышына багышланган утырышы була.
Утырышта Бөек Ватан сугышы музей-мемориалы мөдире М.В. Черепанов, архитектор С.П. Саначин, крайны өйрәнүче Г.М. Гыйльметдинова, Е.А. Боратынский музее хезмәткәре Е.В. Скворцова чыгыш ясаячак. Гаиләләре тарихы Гражданнар сугышы һәм Ак хәрәкәт вакыйгалары белән бәйләнгән казанлыларны утырышта катнашырга чакырабыз.
Иске Казанны сөючеләр клубы 2004 елда крайны өйрәнү белән кызыксынучы тикшеренүчеләр берлеге буларак барлыкка килә һәм төрле юнәлешләрдә эшләүче белгечләрне берләштерә. Аның әгъзалары Е.А. Боратынский музееның “АК ЮЛ, ЯИСӘ РУС ОДИССЕЯСЕ” проектын актив рәвештә хуплап каршы алды. Бу проект быел В. Потанинның Хәйрия фонды уздырган “Үзгәреп торучы дөньяда үзгәреш кичерүче музей” («Меняющийся музей в меняющемся мире») конкурсының “Музей өлкәсендәге тикшеренүләр” («Музейные исследования») номинациясендә җиңү яулады.
Казанда һәм Казан губернасында яшәгән кешеләрнең Гражданнар сугышында катнашуы белән бәйле чыганакларның тарихи-документаль базасын булдыру - проект максатларының берсе. Архив һәм музей чыганакларыннан тыш, шәхси, гаилә тупланмаларында сакланучы һәм моңарчы басылып чыкмаган документлар һәм материалларның кыйммәте аеруча зур.
ТР Мәдәният министрлыгының Матбугат хезмәте