9 ноябрьдә Татар опера театрының балет труппасы Европага гастрольгә китә. Ике ай ярым дәвамында Казан биючеләре Европа Союзының 7 илендә 70кә якын тамаша күрсәтәчәк.

9 ноябрьдә Татар опера театрының балет труппасы Европага гастрольгә китә. Ике ай ярым дәвамында Казан биючеләре Европа Союзының 7 илендә 70кә якын тамаша күрсәтәчәк.

Гастрольләр Норвегиядә башлана. Беренче спектакль (“Аккош күле”) Ставангер шәһәрендә – Скандинавия иленең нефть башкаласында 2011 елның 11 ноябрендә күрсәтеләчәк. Норвегиянең тагын 4 шәһәрендә, шул җөмләдән драматург Генрик Ибсен туган шәһәр Шиенда чыгыш ясаганнан соң труппа Франциягә китәчәк. “Аккош күле” һәм “Кирәкмәгән саклык” («Тщетная предосторожность») спектакльләре Парижда (Рюэй-Мальмезон һәм Лонжюмодагы театрлар), Страсбургта һәм Саргеминда күрсәтеләчәк.

Казан труппасының гастрольләр маршруты Германия, Австрия һәм Швейцария аша узачак. Театрның спектакльләре Иске Дөньяның иң эре мәдәни мәркәзләрендә: Австриядә – Боден күле янында урнашкан һәм 1946 елдан Брегенц музыка фестивале уздырыла торган Брегенц шәһәрендә; Германиядә – бертуган әкиятче Гриммнар туган Ханау шәһәрендә; Швейцариядә – Цюрих шәһәренең мәшһүр Конгрессхаус сәхнәсендә күрсәтеләчәк.
Гастрольләрнең икенче өлеше Даниядә һәм Голландиядә узачак. 2012 елның 1 гыйнварында Татар балеты артистлары Амстердам сәхнәләрендә чыгыш ясаячак (Delamar театрында «Щелкунчик» спектакле). Гастрольләр 2012 елның 29 гыйнварында Амстердамның икенче бер театры- De Meervaart сәхнәсендә «Йокыга талган гүзәл» спектакле белән ябылачак.
Гастрольләр графигы шактый киеренке: бары бер «Аккош күле» генә дә артистлар тарафыннан егерме тапкырдан күбрәк күрсәтеләчәк. Спектакльләрдәге барлык төп партияләрне труппаның әйдәүче солистлары – Кристина Андреева, Александра Суродеева, Михаил Тимаев, Руслан Савденов, Артем Белов – башкара. Читтән чакырылган актерлардан Киев театры балеринасы Татьяна Голякова чыгыш ясаячак.
Татар опера һәм балет театры Россиянең гастрольләргә иң күп йөрүче коллективларының берсе дип санала: 1993 елдан театр Көнбатыш Европа илләрендә (Голландия, Бельгия, Франция, Дания, Португалия, Германия, Австрия, Норвегия, Дания, Швейцария) бик күп тапкырлар гастрольләрдә булды, ул чит илләрдә сезонга 150гә якын спектакль күрсәтә. Гастрольләр саны ягыннан Казан труппасын бары Санкт-Петербургның Мария театры гына узып китә.
ТР Мәдәният министрлыгының матбугат хезмәте