Бөекбритания королевасы органчылары Казанда концерт бирәчәк

23 ноябрьдә Англия королевасы Елизаветы II органчылары Джеймс Парсонс һәм Джеймс МакВинни С.Сәйдәшев исемендәге Зур концерт залында концерт бирәчәк.
Королева органчылары бөек Иоганн Себастьян Бах, француз композиторы Николя де Гриньи (1672 – 1703), романтик юнәлештә иҗат иткән инглиз композиторы Эдуард Элгар (1857 – 1934), Марсель Дюпре (1886 – 1971), француз органчысы һәм композиторы Жан Арист Ален (1911 – 1940), Шотландиянең классик музыка жанрында эшләүче хәзерге заман композиторы һәм дирижеры Джеймс Макмиллан (1959 елда туган) һәм башкаларның әсәрләрен башкарачаклар.
Джеймс Парсонс концерт органчысы буларак халыкара чыгышлары һәм студия язмалары аша бөтен дөньяда мәшһүр. Ул солист буларак чыгыш ясаган концертлар күп кенә илләрдә тамашачылар һәм тәнкыйтьчеләр тарафыннан җылы кабул ителә. Музыкантның «Органное великолепие и величие» (“Органның гүзәллеге һәм бөеклеге”) компакт-дискы аның популярлыгын шулай ук арттырды. Әлеге дискларның меңнән артык нөсхәсе бөтен Европада һәм Япониядә таралды. Джеймс Парсонс Королева орган колледжында эшли.
Джеймс MакВинни - Вестминстер аббатлыгы органчысы. Бу вазыйфаны ул музыкаль эшчәнлек һәм укытучылык эшчәнлеге белән бергә алып бара. Музыка өдкәсендәге карьерасын ул Лондондагы Изге Павел Кафедраль соборында башлый, биредә вакытлыча органчы вазыйфаларын башкара, бер үк вакытта Холборндагы Изге Андрей чиркәвендә музыка директоры булып эшли. Кембриджның Клэр-Колледж хоры белән Джеймс Бөекбританиядә, Европада, АКШта һәм Ерак Көнчыгышта гастрольләрдә була. Ул шулай ук мәшһүр хор коллективларында концертмейстер булып эшли, радиода һәм телевидениедә чыгыш ясый. 2006 елның октябрендә «Naxos» студиясе өчен ул беренче тапкыр С.С. Уэсли орган музыкасын яздыра ( диск” «На органе Уиллиса» (“Уиллис органында”) дип атала).
Казандагы концерт С.Сәйдәшев исемендәге ДЗКЗ да 18.30 сәгатьтә башлана, Концерт "Английское искусство добра и мира" (“Англиянең шәфкать һәм тынычлык сәнгате”) проекты кысаларында РФ Мәдәният министрлыгы, ТР Мәдәният министрлыгы һәм Казан дәүләт консерваториясе ярдәме белән уздырыла.
2011 елның 24 ноябрендә 13.00 сәгатьтә Н. Җиһанов исемендәге Казан консерваториясендә музыкантлар катнашында пресс-конференция узачак.
Татарстан Республикасы Мәдәният министрлыгының Матбугат хезмәте, «Oxford Talent Management» компаниясе генераль директоры Татьяна Уайт ярдәме белән