«Рухият» китаплар өләште

Бүген “Казан” Милли мәдәният үзәгендә “Рухият” фондында нәшер ителгән китапларны китапханәләргә тапшыру чарасы үтте. Тәкъдир итү чарасында әлеге фонд ярдәме белән дөнья күргән китаплар тәкъдим ителде. Болар: Рөстәм Зәкуанов, Тәлгат Нәҗмиев, Гамирә Гаделшина, Миргазыян Юныс, Марсель Галиев, Нәфисә Сабирҗанова, Рабит Батулла, Мөдәррис Ибраһимов кебек автор китаплары. Аларның барысы да Казан Дәүләт университеты, Татар Дәүләт гуманитар-педагогика университеты, Казан Дәүләт мәдәният һәм сәнгать университеты, Бөтендөнья татар конгрессы һәм Республиканың Милли китапханәсенә тапшырылды.

 “Рухият” 1997 елда «Татнефть» ААҖ тарафыннан оештырылды. Нашер итү – аның иң мөһим эшчәнлек юнәлешләренең берсе санала. Фонд талантлы, әмма аудиториягә таныш булмаган шагыйрь һәм язучыларга булышу белән шөгыльләнә. Аеруча татар халкының тарихы, мәдәнияте һәм рухи тормышы хакындагы китапларны нәшер итүгә йөз тота, шулай ук татар милләтенең алдынгы җәмәгать эшлеклеләре хакындагы китаплар чыгара (әлеге сериядән беренче китап Шиһабетдин Мәрҗәни турында). Шунысы игътибарга лаек – кайчандыр нефть чыгару төбәгенең яшь прозаиклары ярдәме белән оештырылган “Рухият” фонды бүгенге көндә бөтен Россиядә танылу тапты.

Фонд быстырган иң эре эшләрнең берсе – “История татар с древнейших времен” җиде томлылыгы. Шулай ук 1998нче елдан Фәнис Яруллинның иҗаты да томнарда чыгарыла башлады. Бөек композиторыбыз Сара Садыйкованың тууына 100 ел тулуга багышлап, нәшрият рус һәм татар телләрендә “Песнь благодарности” китабын нәшер итте.  

10 ел эшләү дәверендә “Рухият” фонды 100 дән артык китап чыгарды. Бүгенге көндә 24 млн. сумлык 200 мең китап китапханә, уку йортларына тапшырылган. Ә яңа китапларны тәкъдир итү кичәләрен исә ел саен Әлмәт һәм Казанда үткәрү – матур традициягә әйләнде.