Милли галереядә “Татарстан – уртак йортыбыз” фото күргәзмәсе ачылды.

“Татарстан – уртак йортыбыз” фото күргәзмәсе Казанда 3 ноябрь көнне узган Татарстан халыклары Съезды кысаларында әзерләнде. Күргәзмәдә тәкъдим ителгән эшләрнең күбесе “Татарстан – уртак йортыбыз” альбомына да кертелде. Әлеге альбом съезд делегатлары һәм кунакларына тапшырылды. Рус, татар, инглиз телләрендә чыгарылган “Татарстан – уртак йортыбыз” альбомы халыклар дуслыгы, милли колорит һәм мәдәниятләр күптөрлелеген ассызыклау идеяләре белән сугарылган. Альбомга Татарстанның иң яхшы яшь һәм алдынгы фотограф эшләре кертелгән. Алар арасыннан Рифат Якупов, Солтан Исхаков, Евгений Канаев, Михаил Козловский, Владимир Зотов, Сергей Ермолаев, Эдвард Хәкимов, Фәрит Гобәев, Юрий Филимонов, Андрей Титов, Алексей Насыров, Альберт Тәһәвиев, Гөлнара Сәгыева, Әлфия Бикмөхәммәтова, Фәрит Зыятдинов кебекләрне билгеләп үтәргә мөмкин.  

Фотоальбомны тәкъдир итү һәм Милли сәнгать галереясендә күргәзмәне ачу тантанасында Татарстан Республикасы сынлы сәнгать музее директоры Розалия Нургалиева альбомны әзерләгән вакытта коллектив тарафыннан нинди эшләр башкарылганлыгы хакында сөйләп үтте.  Кыска гына вакыт эчендә алга куелган идеяне халыкларның көндәлек тормышын, аларның бәйрәмнәре, үзара могамәләсен сурәтләгән фотолар аша аңлата алуга ирешкәннәр. Басманың редакторы – “Казан” журналының баш редакторы – Юрий Балашов, альбомны төзүче һәм макет авторы – республика күләмендә танылган фотограф Фәрит Гобәев, тышлык һәм сәнгать редакторы – рәссам һәм фотограф – Григорий Эйдинов. Альбом басмаханәгә Татарстан Республикасы Мәдәният министрлыгы һәм “Kazan - Казань ” нәшрияты тарафыннан җибәрелде. Презинтация барышында фотоальбомны төзегән коллективка Мәдәният министрлыгы исеменнән бүләкләр тапшырылды. “Татарстан – уртак йортыбыз” фотокүргәзмәсе декабрь ахырына кадәр эшләячәк. 

2002 елда үткән Бөтенроссия халык санын алу вакытында Татарстан территориясендә 120дән артык милләт вәкиле һәм этник төркемнәр яшәгәнлеге ачыкланды. Алар биредә бер-берсе белән тигез могамәләдә булып, тынычлык саклап яши. Татарстанлылар беренче чиратта нәкъ менә шуның белән горурлана ала да!