Татарстан Республикасы Мәдәният министрлыгы

Зилә Вәлиева: "Алтын Минбәр" - террорлык белән көрәшү коралы"

2007 елның 5 сентябре, чәршәмбе

Казанда быел өченче тапкыр зурлап уздырыла торган "Алтын минбәр" халыкара мөселман киносы фестиваленең кайтавазы елдан-ел ераккарак ишетелә. Казанның меңьеллыгында фестивальдә нибары 12 ил (40 эш) катнашса, быел исә 46 ил (200гә якын эш) теләк белдергән. Шунысы үзенчәлекле: фестиваль Европа кинематографистлары игътибарын җәлеп итте. Мөселман киносы җыенында быел 14 дәүләт вәкиле катнашырга теләк белдерүе шул хакта сөйли. Инде икенче фестивальне оештырган вакытта ук аның профессионалларга кызыклы булуы аңлашылган. Бу хакта бүген журналистлар белән очрашуда ТР Премьер-министры урынбасары, Мәдәният министры Зилә Вәлиева хәбәр итте.
    Шушы көннәрдә кино белгече һәм тәнкыйтьчесе Сергей Лаврентьев җитәкләгән сайлап алу комиссиясе үз эшен тәмамлады. Шулай итеп, тамашачылар хозурына 49 фильм тәкъдим ителә. Аның уналтысы - тулы метражлы, унбише - кыска метражлы, уникесе - документаль картина һәм алтысы - телевидениедә күрсәтелгән репортажлар. Конкурста Татарстаннан Аким Салбиевның "Одиннадцать писем к Богу" (Россия, Төньяк Осетия), Башкортстаннан - "Две жены", Татарстаннан рамил Төхвәтуллинның "Дилемма" һәм Салават Юзиевнең "121" кыска метражлы кыска метражлы фильмнары катнаша. 2005 елда конкурста катнашучылар 27 иде.
    Быел бәйгедән тыш программада күрсәтелүче фильмнар да - егерме җиде. Россиядән Павел Лунгинның "Остров" һәм Франция-Палестинаның "Божественное вмешательство" уртак фильмы (режиссеры Элия Сөләйман) бик әһәмиятле картиналар булып санала. Шулай ук Иран режиссеры Надер Талебзаденың - "Мессия", Бурлам Герружның "Зайна: Покорительница Атласских гор" (Германия-Франция), "Грбавица" (Австрия-Босния һәм Герцеговина-Германия-Хорватия), "Туземцы" (Франция-Алжир) кебек тулы метражлы нәфис фильмнар халыкта кызыксыну уятыр дип көтелә. Фестиваль бит әле ул - кино карау гына түгел, кино төшерүчеләр белән очрашу һәм тәҗрибә уртаклашу урыны да. Быел оештырылачак остаз мәктәпләре шул рольне үти.
    "Алтын минбәр" фестивале республикада үз тамашачысын тапты. Елдан-ел "Сувар Плаза" сәүдә үзәгендәге "Гранд синема" кинотеатрын "штурмлаучы" киноманнар саны арта бара. Хәтта кешеләр мөселман киносын идәндә, баскычта утырып карарга да риза. Шуңадырмы: быел бәйгедән тыш кинотасмалар "Мир" кинотеатрында күрсәтелә. Бу фильмнарны башка бер фестивальдә дә күрә алмыйсың бит. Шуңа күрә Казан халкын аңларга да була. Зилә Вәлиева белдергәнчә, алдагы елларда башка кинокомплекслар да тартылачак. Мәдәният министры "Алтын минбәр"нең мөмкинлекләрен бик югары бәяли. Аның террорлык белән көрәшүдә сәнгать "коралы" булуын билгеләп үтте.

БАРЛЫК ЯҢАЛЫКЛАРНЫ УКУ