Хәзерге заман сәнгате галереясендә «Бренингларда кунакта. Бренинглар йортының мемориаль предметлары» дигән кызыклы күргәзмә ачыла
25 декабрьдә көндезге сәгать өчтә Хәзерге заман сәнгате галереясендә «Бренингларда кунакта. Бренинглар йортының мемориаль предметлары» дигән кызыклы күргәзмә ачыла.
XIX гасыр ахыры - XX гасырда яшәгән мәшһүр шәхес – Арнольд Иванович Бренингның исеме Казанның өлкән яшьтәге кешеләренә, тарихчылар һәм туган якны өйрәнүчеләргә яхшы таныш. Һөнәре буенча ул – фармацевт, хәзерге Бауман урамындагы мәшһүр даруханә хуҗасы.
Бренинг бик яратып фотога төшерү сәнгатен үзләштерә. Аның фотосурәтләрендә – чорының бик күп күренекле вакыйгалары, гади һәм атаклы кешеләр портретлары, табигать күренешләре.
Бренинг – шәхес культы корбаны. Шул котычкыч чорда яшәгән күп кенә бәхетсезләр кебек үк, ул да бер гаепсезгә 1937 елда атып үтерелә.
Күргәзмәдә Арнольд Бренинг һәм аның гаиләсенең көнкүреш әйберләре – йорт җиһазлары, даруханә шкафлары, уенчыклар, кием-салым, фотоаппарат, фотографияләр, картиналар, тартмачыклар, савыт-сабалар һ.б. куелган.
Татарстан Республикасы Мәдәният министрлыгының Матбугат хезмәте