Татарстанның табигать тарихы музеенда «Көтелмәгән кадерле бүләк» дигән акция башланды
Без һәммәбез Яңа ел бәйрәмнәренең могҗизалар алып килүен беләбез! Һәр кеше, олымы ул, кечеме, озак яшәп, тормыш тәҗрибәсе туплаганмы, яисә әле яңарак кына биләүдән төшеп, тәүге адымнарын атлыймы – барыбер, бу бәйрәм көннәреннән гаҗәеп, тылсымлы вакыйгалар, кадерле бүләкләр, шатлык-сөенечләр көтә. Артык зур булмаган могҗизаларны кеше үз куллары белән дә иҗат итә ала.
Татарстанның табигать тарихы музее үзенең кунаклары өчен көтелмәгән тылсымлы “күчтәнәч” әзерли. Бар нәрсә дә гап-гади: билгеле бер вакытта музей залларының берсендә тамашачыларны Яңа ел бүләге көтә. Залларның кайсында, кайчан нәрсә буласын бер кем дә алдан белми. Бу табышмакка җавапны балалар һәм аларның әти-әниләре бергәләп музей экспозицияләрендә табарга тиеш була. Акция 8 гыйнварга кадәр дәвам итәчәк.
Мәгълүмат өчен: 567-80-37
Татарстан Республикасы Мәдәният министрлыгының Матбугат хезмәте