Казанда Рудольф Нуриев исемендәге XXXIX Халыкара классик балет фестивале узачак
2026 елның 12-31 маенда Муса Җәлил исемендәге Татар дәүләт опера һәм балет театры сәхнәсендә узачак Рудольф Нуриев исемендәге XXXIX Халыкара классик балет фестивале спектакльләренә билетлар 24 мартта сатылачак.
Фестиваль программасы С.Прокофьевның «Золушка» балеты премьерасы белән ачылачак. XX гасырның иң якын симфоник партитураларының берсе Надежда Калинина хореография версиясендә һәм Сергей Новиков сценографиясендә яңача аңлатылачак. Куелышның музыкаль җитәкчесе булып билгеле дирижер, Әрмиян милли опера һәм балет театры директоры Карен Дургарян чыгыш ясаячак.
Фестиваль афишасында – XIX-XX гасырлар балет мирасы шедеврлары («Баядерка», «Корсар», «Дон Кихот», «Щелкунчик»), милли классика (Ф.Яруллинның «Шүрәле»), шулай ук театрның авторлык спектакльләре (М.Теодоракисның «Грек Зорба»сы Л.Мясин хореографиясендә, П.Чайковскийның «Аккош күле» В.Васильев хореографиясендә) урын алган. Спектакльләрдә Россиянең һәм чит илләрнең алдынгы театрлары вәкилләре – артистлар һәм дирижерлар катнашачак.
Моннан тыш, фестиваль кысаларында Борис Эйфман исемендәге Санкт-Петербург балет театры труппасының П.Чайковский, А.Шнитке һәм Ж.Бизе музыкасына «Кызыл Жизель» спектакле белән килүе көтелә. Фестивальнең бер өлеше булып балет сәнгате эшлеклеләре белән очрашуларны, хореография сәнгатен үстерү мәсьәләләре буенча түгәрәк өстәлне үз эченә алган белем бирү программасы да торачак.