Шаляпин стипендиясенә гаризалар кабул ителә
Татарстан Республикасы Милли музее һәм аның филиалы – Горький һәм Шаляпин музее 2025 елның иң яхшы яшь вокалистлары арасында Шаляпин стипендиясе алуга конкурс игълан итә.
Шаляпин стипендиясе-1912 елда Шаляпин үзе нигез салган традициянең символик дәвамы. Россиягә соңгы килүендә Федор Иванович алтынчы шәһәр башлангыч училищесының иң яхшы укучысына исемле стипендия булдырган. 1997 елдан бу традицияне Горькийның әдәби-мемориаль музеенда (хәзер Горький һәм Шаляпин музее) торгызганнар.
Михаил Казаков, Алексей Тихомиров, Аида Гарифуллина, Дамир Закиров, Владимир Васильев, Игорь Макаров һәм башка талантлы вокалистлар стипендиягә ия булдылар. Аларның күбесе Россия опера сәхнәсенең горурлыгын тәшкил итә һәм дөньяның әйдәп баручы концерт мәйданчыкларында чыгыш ясый.
Быел номинацияләү шартлары үзгәрде. Конкурста яшь башкаручылар – махсуслаштырылган музыка мәктәпләренең һәм өстәмә белем бирү мәктәпләренең, урта махсус уку йортларының (музыка училищелары, музыка көллиятләре), югары уку йортларының (консерватория, институт, академия, университет) 15 яшьтән 25 яшькә кадәрге өлкән сыйныф укучылары катнаша ала. Узган елларның җиңүчеләре кабат стипендиягә номинацияләнергә хокуклы түгел.
Кандидатларны Шаляпин стипендиясенә тәкъдим итүне профильле мәгариф учреждениеләре, концерт оешмалары, иҗат берлекләре үткәрә. Номинантларны оештыру комитеты билгеләячәк. Гаризалар 27 гыйнварга кадәр кабул ителә. Номинантларны халык алдында тыңлау датасы турында өстәмә хәбәр ителәчәк.
Стипендия һәм контактлар турында тулырак мәгълүматны сылтама буенча табарга мөмкин.