Сәләт Биләрдәге форумның иҗади сменасында яшь талантларга үсәргә мөмкинлек бирә
Бу көннәрдә Биләрдә XII Халыкара «Сәләт» яшьләр уку-укыту форумының икенче сменасы — Иҗат Биләр Форум (Творчество /Arts) уза.
Өченче ел рәттән смена өч юнәлеш буенча: театр, музыка һәм бию лабораторияләр форматында уза. Аларда катнашу өчен кастинглар үткәрелде. Сайлап алу этабын үткән яшьләр лабораторияләрдә шөгыльләнә, калган балалар Татарстанның һәм Россиянең әйдәп баручы белгечләреннән остаханәләрдә белем ала.
Без юнәлеш җитәкчеләре: Г. Кариев исемендәге Татар дәүләт яшь тамашачы театры актрисасы һәм режиссеры Лилия Нурель (театр), җырчы, актриса һәм вокал буенча педагог Зәринә Вилданова (музыка) һәм хореограф-куючы, биюче Венера Галимова (бию) белән аралаштык.
Лилия Нурель (театр юнәлеше):
«Быел гаризалар алдагы елларга караганда күбрәк булды. Бу безне бик сөендерде. Ел саен без кызыклы уку-укыту программасы төзергә һәм үз өлкәләренең чын осталары булган төрле белгечләр алып килергә тырышабыз. Артистлар гына түгел, режиссерлар, рәссамнар, конферансье, продюсерлар һәм балаларга аралашырга һәм кыйммәтле тәҗрибә тупларга кызыклы булырдай барысын да.
Быел без театр һәм актерлык сәнгатенең барлык юнәлешләрен колачларга тырыштык: идеядән башлап, тормышка ашыру һәм танытуга кадәр.
Без алган гаризалардан күренгәнчә, балаларның иҗади эшчәнлек дәрәҗәсе артты. Аларның тырышуы, үсүе һәм уңышка омтылуы күренә. Без дә моңа ярдәм итәбез дип ышанасы килә.
Лабораторияләр кысаларында балалар режиссер Илнур Гарифуллин җитәкчелегендә Г.Тукайның «Су анасы» әкиятенә эскиз әзерләячәкләр. Режиссер Регина Саттарова «Ромео һәм Джульетта» пьесасын уку буенча чыгыш тәкъдим итәчәк. Режиссер Камил Гатауллин балалар белән бергә «Сак-Сок» татар легендасы буенча театраль эскиз әзерләячәк».
Зәринә Вилданова (музыка юнәлеше):
«Без катнашучыларның санына басым ясадык һәм яшь чикләрен бераз киметтек. Быел без 14 яшьтән олырак балаларны кабул иттек: көллият һәм югары уку йортларыннан вокалистлар һәм музыкантлар. Моннан тыш, быел катнашучылар кастингка татар телендәге җырлар гына түгел, ә башка телләрдәгеләрне дә җибәрү мөмкинлеге алды — шулай итеп без аларның вокаль мөмкинлекләренә дөресрәк бәя бирә алдык.
Быел бездә өч лаборатория: электрон музыка, этно-фолк юнәлеше һәм кино музыкасы. Сергей Костюжов җитәкчелегендә балалар электрон эшкәртүдә «Хәерле көн, Сәләт аланы» җырының яңа яңгырашлы вариантын әзерли башлады. Никита Савельев һәм Дмитрий Балакин катнашучылар белән бергә мультфильм өчен татар мотивлары белән музыка әзерләячәкләр. «Этномузыка» лабораториясе вакытында Тимур Милюков җитәкчелегендәге балалар «Әдрән диңгез» җырын заманча эшкәртәчәкләр.
Узган ел бездә охшаш юнәлешләр бар иде, ләкин вакыт узу белән лаборатория продуктлары сыйфатлырак һәм кызыклырак була бара дип әйтә алам. Гомумән, еллар узу белән форум һәм балалар белән эшләү яхшы якка гына үзгәрә.
Сәләттә без яшь талантларның үсешенә ярдәм итәргә тырышабыз. Мәсәлән, 2021 елда без иҗади конкурслар үткәрүче «Таврида» арт-кластеры белән хезмәттәшлек иттек. Форумда чыгыш ясаганнан соң, балалар төбәк этабын узып, Россия турында катнашу мөмкинлеге алдылар.
Узган ел форумга «Yummi Music» лейблы вәкилләре килде, алар катнашучыларны Казанда узучы музыкаль фестивальләргә, шул исәптән TatCultFestка һәм башка бик күп чараларга сайлап алды.
Быел без Әлфия Авзалова исемендәге фонд белән хезмәттәшлек итәбез. Уңышлы чыгыш ясаган очракта балалар фонд үткәргән вокал конкурсының соңгы этабына эләгә алачак».
Венера Галимова (бию юнәлеше):
«Безнең юнәлеш ел саен башкаручыларның һәм катнашучыларның сыйфатлы үсешен күрсәтә - моны остазлар да, үзебез дә күрәбез. Даими рәвештә яңа критерийлар барлыкка килә, әмма бу сыйфатка да тәэсир итә - балалар дәртләнеп киләләр һәм остаханәләрдә, иҗади лабораторияләрдә эшләүгә аңлырак карыйлар.
Быел өч төрле юнәлеш булачак: заманча бию, вог-бию һәм татар халык биюе. Аларны Ксения Бурмистрова, Регина Ланвин һәм Сәйдә Минубаева үткәрәчәк. Смена ахырына балалар, татар мәдәнияте һәм сәнгатенә басым ясап, эскизлар, бию миниатюралары һәм перформанслар әзерләячәкләр.
Хәтта ел саен килгән балалар да яңа нәрсәләр өйрәнә алсын өчен без ел саен белгечләр исемлеген һәм иҗади лабораторияләрне яңартабыз.
Без программаны бала нинди генә катнашу форматын сайласа да, смена аңа максималь файда китерерлек һәм ул күпкырлы белемнәр ала һәм яңа танышулар таба алырлык итеп төзибез».
Смена нәтиҗәләре буенча, 4 июльдә 20.30да гала-концерт булачак, анда иҗади лабораторияләр проектлары тәкъдим ителәчәк.
«Сәләт»нең рәсми сайты http://selet.biz/tat/
«Сәләт» форумының рәсми сайты https://biler.selet.biz/
«ВКонтакте» төркеме https://vk.com/selet.official
Телеграм-канал https://t.me/seletofficial