Фәрит Бикчәнтәев яңа актерлык-режиссерлык курсы җыя
Актерлык-режиссерлык осталыгы буенча белем алырга теләүчеләргә көтелмәгән мөмкинлек. Фәрит Бикчәнтәев курсына өстәмә шәкертләр җыя. Фәрит Бикчәнтәев җитәкчелегендә яңа татар актерлык-режиссерлык курсына июль аенда кабул итү имтиханнары узган иде. Аларның нәтиҗәләре буенча, бу курска тагын өстәмә рәвештә ир-егетләр кабул ителәчәк. Кабул итү имтиханнары 27нче һәм 28нче августта була. Гаризаларны 15нче августтан 17сенә кадәр Казан дәүләт мәдәният һәм сәнгать университетының кабул итү комиссиясенә тапшырырга кирәк.
Бикчәнтәевнең яңа актерлык-режиссерлык курсына кабул итү имтиханнары түбәндәгеләрдән гыйбарәт: рус теле, рус әдәбияты, әңгәмә һәм актер осталыгы (шигырь, мәсәл яки чәчмә әсәрдән өзек; җыр, бию, музыкаль әсәр башкару). Моннан тыш, “Драма режиссеры” юнәлеше буенча укырга җыенучы абитуриентлар, “Практик режиссура”дан өстәмә имтихан да тапшырырга тиеш .
Кабул итү шартлары һәм әзерлек өчен кирәк булган әдәбият исемлеге белән Камал театры сайтында (kamalteatr.ru) танышырга мөмкин. Өстәмә мәгълүматны 277-59-17, 277-05-54 телефоннары аша Казан дәүләт мәдәният һәм сәнгать университетының кабул итү комиссиясеннән алырга була. Барлык абитуриентларга да татар телен белү мәҗбүри.