Чирмешәндә “Созвездие-Йолдызлык” фестивале кысаларында узган мастер-класс Минсәгыйть Шакиров истәлегенә багышланды
Татарстанда ел саен “Созвездие-Йолдызлык” эстрада сәнгате ачык республика телевизион яшьләр фестиваленең танылган жюри әгъзаларыннан мастер-класслар сериясе үткәрелә. Кичә Чирмешән районында проектта катнашучылар һәм аларның педагоглары белән очрашу булды.
Мастер-класслар сериясе узган ел ук башланды. 2022 елның декабрендә осталар булачак фестивальдә катнашучылар белән Түбән Кама, Менделеевск шәһәрләреннән, Кайбыч һәм Апас авылларыннан тәҗрибә уртаклашырга өлгерде.
Чирмешән районы маршрут картасына очраклы гына эләкмәгән. Дәресләр Чирмешән районының легендар элекке башлыгы Минсәгыйть Закир улы Шакиров истәлегенә хөрмәт билгесе булды. Исегезгә төшерәбез, ТР Муниципаль берәмлекләр советының элеккеге рәисе Минсәгыйть Шакиров 2023 елның 15 гыйнварында вафат булды. Аңа 75 яшь иде.
“Минсәгыйть Шакиров – безнең фестивальгә нигез салучыларның берсе. Ул безнең проектны армый-талмый хуплады. Минсәгыйть Закир улы бу башлангычны берничә тапкыр ябылудан коткарды, аны республиканың Сабантуй кебек үк мөһим бәйрәме дип санады. Аның “Созвездие-Йолдызлык” фестиваль хәрәкәтенә ышануы булмаса, бүген проект булмас иде. Миллионлаган йолдызлар гаиләсе аңа фестиваль үсешенә керткән өлеше өчен рәхмәтле һәм аның якыннары белән бергә кайгыра”, - дип сөйләде фестивальнең генераль продюсеры, РФ Хөкүмәтенең мәдәният өлкәсендәге премиясе лауреаты, Татарстанның һәм Кырымның атказанган сәнгать эшлеклесе Дмитрий Туманов.
Аның истәлекләре буенча, Минсәгыйть Шакиров “Созвездие-Йолдызлык” фестиваленә озак һәм якты киләчәк юраган, чөнки нәкъ менә анда Россиянең күпмилләтле халкының мәдәни коды саклануына ышанган.
Бу юлы балалар һәм аларның педагоглары өчен мастер-классларны Дмитрий Туманов үзе, шулай ук РФ атказанган, ТР халык артисты, ТР Дәүләт җыр һәм бию ансамбленең баш балетмейстеры Раилә Гарипова, “Дорога из города” бию театры җитәкчесе, ТР атказанган мәдәният хезмәткәре Айрат Баһаветдинов, Брунов ис. эстрада артистлары фестиваль-конкурсы Гран-при иясе, “Созвездие-Йолдызлык” сәнгать резиденциясе артисты, вокал мәктәбенә нигез салучы Владимир Шнитко уздырды.
Остазлар сүзләренчә, Чирмешән районының талантлы балалары проектта катнашкан елларда, аерым алганда, вокал сәнгате һәм конферанс юнәлешләрендә абруй казанган.
“Республика районнарындагы күренекле сәнгать эшлеклеләреннән бушлай мастер-класслар – педагоглар өчен бик сирәк күренеш һәм чын бүләк. Үз шәкертләрең белән тирән эштә еш кына кайбер хаталарга игътибар бирми башлыйсың. “Созвездие-Йолдызлык” интенсивларында бу хаталар ачыклана. Безгә остазларны тыңлап, республиканың шундый мөһим мәдәни вакыйгасы алдыннан хаталарны төзәтергә генә кала”, - дип уртаклашты җирле музыка мәктәбе педагогы.
Дмитрий Туманов билгеләп үткәнчә, педагоглар үз укучыларын проектта катнашуга ныклап әзерли. Ләкин иң еш әйтелә торган киңәш: остазлар аларны репертуар сайлауга игътибарлырак булырга өнди.
“Бу мәсьәләдә илнең мәдәни кодының югары сәнгатьле булуына, тирәнлегенә һәм көченә игътибар итү мөһим. Моннан тыш, укучылардан булдыра алганыннан артыгын таләп итмәскә һәм аларны кызыксындыра торган әсәрләр бирергә кирәк”, - дип билгеләде Дмитрий Туманов.
Мастер-класслар сериясе Татарстанның башка шәһәр һәм авылларында да дәвам итәчәк. Үткәрү урыннары һәм вакыты соңрак билгеле булачак.