Беларусь Республикасы мәдәнияте көннәре фильмнар күрсәтү белән башланып китте
Кичә кич белән "Республика" сәүдә үзәгендә урнашкан "Cinema 5" кинотеатрында Белоруссия киносы кичәсе узды. Монда ике фильм: "Диверсант язмышы" һәм "Подрыв" картиналары күрсәтелде.
Чара Беларусь Республикасы мәдәнияте көннәре кысасында узды, алар Россия Федерациясе мәдәният министрлыгы һәм Беларусь Республикасы мәдәният министрлыгы ярдәме белән уздырыла.
Кино күрсәтү кичәсен Россия һәм совет актеры, Беларусь Республикасының атказанган сәнгать эшлеклесе, Белоруссия кинематографистлары берлеге рәисе Виктор Васильев ачты.
Кичәдә Беларусь Республикасының Казандагы мактаулы консулы, Белоруссия милли-мәдәни автономиясенең Халыклар дуслыгы йорты башлыгы Сергей Маруденко катнашты. Ул Беларусь Республикасы мәдәнияте көннәре программасын игълан итте һәм барысын да Казан халыкара мөселман киносы фестиваленә чакырды, ул анда җиңүчеләрне бүләкләү тантанасында катнашачак.