Яр Чаллыда "Мастеровые" театры 2022 елда ачыла
«Мәдәният» милли проекты кысаларында Яр Чаллыда 2022 елның сентябрендә «Мастеровые» рус драма театры ачылачак.
«Мастеровые» - бай тарихлы театр. 2017 елда «Алтын битлек» Россия милли театр премиясенең Эксперт советы Чаллы театрының «Кроличья нора» (Куян оясы) спектаклен үзенең лонг-битенә кертте. Театр берничә тапкыр Халыкара фестивальләр лауреаты булды.
Объект шәһәрнең Тантаналар сарае янында Чулман проспектында төзелә. 25 мең кв.м мәйдан тәшкил иткән дүрт катлы бина хай-тек стилендә эшләнә. Административ һәм хезмәт биналарыннан тыш, театрда фотоостаханәсе, балалар бүлмәсе, тавыш яздыру студиясе, 100 тамашачыга исәпләнгән кече зал, 500 тамашачыга исәпләнгән эстрада залы, кафе, күргәзмәләр залы, видеотека һәм архив булачак. Шулай ук театр территориясендә 140 машинага урын, шул исәптән инвалидлар өчен дә шартлар тудырылган.
Төзелешне «Евростиль» оешмасы алып бара, алар шулай ук Аяз Гыйләҗев исемендәге Чаллы дәүләт татар драма театрын да төзегән иде.
«Мастеровые» театры директоры Армандо Диамантэ түземсезлек белән эшнең тәмамлануын көтә. Ул төзелешкә көн саен килә.
"Безгә бина төзелешенең ничек баруын күрү бик мөһим. Чөнки аны без кулланачакбыз", - ди театр директоры.
Төзелеш эшләрен 2022 ел театр сезонына тәмамлау планлаштырыла.