Зөя утрау-шәһәрчегендә 29 майда “Музей Төне” узачак
«Зөя утрау–шәһәрчеге» дәүләт тарих–архитектура һәм сәнгать музей-тыюлыгы ел саен үткәрелә торган «Зөя утрау-шәһәре музеенда бер төн» чарасын тәкъдим итә. Ул шимбә көнне, 29 майда узачак.
Музей залларында экспонатлар җанланачак һәм “Sforzando” фонды конкурслары һәм фестивальләре лауреатлары башкаруында музыка яңгыраячак, “Рус балеты” хореография мәктәбе укучылары “Кечкенә балет тарихы” программасын тәкъдим итәчәк. Успен мәйданында пианист Илсур Вельгас классик джаз композицияләре һәм импровизацияләр башкарачак.
Зөя шәһәрчеге музее ишегалдында Казан театр училищесының икенче курс студентлары «Хаим» пластик-шигъри спектаклен күрсәтәчәк.
Балалар өчен яшь актерлар “Күңелле сәяхәт" спектаклен куячак. Шулай ук нәниләр өчен уеннар, викториналар, конкурслар, сабын куыклары тамашасы булачак.