Рөстәм Миңнеханов Чаллы Татар дәүләт драма театрын ачты
Бүген Чаллы шәһәрендә Аяз Гыйләҗев исемендәге Татар дәүләт драма театры ачылды. Тантаналы чарада Татарстан Республикасы Президенты Рөстәм Миңнеханов һәм Чаллы мэры Наил Мәһдиев катнашты.
Рөстәм Миңнеханов ассызыклаганча, театр Чаллының әдәби-мәдәни йөзен чагылдыручы әһәмиятле үзәккә әйләнәчәк. “Бу безнең күптәнге хыялыбыз иде. Чаллы театрының 30 ел дәвамында үз бинасы булмады. Әлеге проектны гамәлгә ашыруда катнашучыларга рәхмәт белдерәсем килә”, - дип билгеләп үтте ТР Президенты.
Аннары Рөстәм Миңнеханов өчен театр бинасы буйлап экскурсия уздырдылар. ТР Президенты 300 урынга исәпләнгән тамаша залында булды. Зал бизәлешендә дизайнерлар татар милли орнаментын кулланганнар.
Икенче катта Рөстәм Миңнеханов музейны карады, анда театр костюмнары һәм архив фоторәсемнәр тәкъдим ителгән иде.
Татарстан Республикасы Президентына хәбәр ителгәнчә, театр бинасында шулай ук яшьләр үзәге булдырылачак, аның төп юнәлеше заманча татар сәнгатен үстерүдән гыйбәрәт булачак. Биредә әдәби һәм театраль студияләр, режиссерлар остаханәсе, музыкаль лаборатория урнашачак.
Чаллы татар дәүләт драма театры - Татарстан Республикасындагы иң яшь театр коллективларының берсе. Театрның иҗат юлы 1990 елның 21 декабрендә башлана. 30 ел эчендә театр сәхнәсендә 120дән артык спектакль куелган. Кайбер спектакльләр республика, Россия һәм халыкара театр фестивальләрендә призлы урыннар яулаган.