ТР мәдәният министрының беренче урынбасары Юлия Әдһәмова Казанның иң көчле чаңгычылары өчлегенә керде
Казанда узыш инде 16 нчы тапкыр үткәрелде. Чаңгы бәйрәме дүрт мәйданчыкта узды, төп старты, гадәттәгечә, Юдино бистәсендәге «Локомотив» стадионында бирелде.
Хатын-кызлар арасында VIP-узышта ТР мәдәният министрының беренче урынбасары Юлия Әдһәмова өченче урын яулады. Узышта беренчелекне ТР финанс министрының беренче урынбасары Алла Анфимова алды, икенче урында - ТР Министрлар кабинеты Аппаратының Сәламәтлек саклау һәм спорт мәсьәләләре идарәсе җитәкчесе Гүзәл Шакирова.
Быел «Россия чаңгы юллары» чарасы «Демография» илкүләм проектының «Спорт — тормыш нормасы» федераль проекты кысаларында оештырылды. Дистанцияләрнең берсе - ТАССРның 100 еллыгына багышланды.
Стартка 21,5 меңнән артык кеше чыкты. Алар арасында — профессиональ спортчылар, спорт ветераннары, мәктәп укучылары, студентлар, пенсионерлар һәм башкалар.
Бөтенроссия массакүләм ярышларына Россия Федерациясенең 73 төбәге кушылды.