Казанда «Порги һәм Бесс» репетицияләре башланды

Казанга Татарстан Республикасы Дәүләт симфоник оркестрының яңа проектында – Американың заманча академик музыкасы кичәсендә катнашачак дирижер һәм солистлар килде.
Программада – Гершвинның «Порги һәм Бесс»ы, Бернстайнның «Кандид» операсына увертюрасы һәм Уильям Грант Стиллның Россиядә беренче тапкыр яңгыраячак Африка-Америка симфониясе.
ТР ДСО сәнгать җитәкчесе Александр Сладковский проектта катнашу өчен АКШтан «Грэмми» премиясе, NAACP 2011 һәм «Граммофон» номинантлары Дарнелл Ишмелны һәм дирижер Марлон Дэниелны, шулай ук Бөекбританиядән Элисон Бьюкененны чакырды.
Оркестр белән беренче уртак репетициядән кунаклар канәгать калдылар.
- Монда килгәнче оркестр чыгышы язмаларын интернеттан карадым, ә бүген исә музыкантлар белән инде турыдан-туры эш барышында таныштым, – диде дирижер Марлон Дэниел. – Артистларның яшь булуы гаҗәпләндерде, Көнбатышта бу сирәк күренеш. Әлеге коллективның осталык дәрәҗәсе югары булуын билгеләп китәргә кирәк. Мондый оркестр белән эшләү үзе бер бәхет!
Марлон Дэниел бу проект белән нәкъ менә Казанда чыгыш ясауның үзе бер мактаныч икәнлегенә басым ясады. Кунаклар “шәһәрнең төрле диннәр һәм милләтләр бергә кайный торган зур казан” булуын тоемлап өлгергәннәр инде.
- Бу музыкага битараф калу мөмкин түгел. Гершвинны башкарганда, музыкантларның йөзендә елмаю балкый, ә тамашачылар ихтыярсыз көй уңаена “баса” башлый. – ди Элисон Бьюкенен. «Порги һәм Бесс»ның аңа һәрвакыт яңа ягы белән ачылуын билгеләп, Бьюкенен сүзләрен Дарнелл Ишмел да куәтли.
Концерт 11 февральдә була. Ул Икеяклы Россия-Америка президент комиссиясе эгидасындагы “Россиядә Америка сезоннары” программасы кысасында уздырыла.