Тинчуринлылар Брюссельгә Тукай шигъриятен алып бара

Гыйнвар ахырында Брюссельдә Кәрим Тинчурин исемендәге Драма һәм комедия театры гастрольләре узачак. Ул Габдулла Тукайның тууына 125 ел тулуга багышлана.
Тинчуринлылар Брюссельгә, шул исәптән Европаның үзенә дә, гастрольгә беренче тапкыр чыга. Труппа Евросоюз башкаласында “Сөй гомерне!” дип аталган лирик спектакль күрсәтәчәк. Биш актер катнашкан музыкаль-шигъри композиция Габдулла Тукайның нечкә лирикасына һәм балачак хатирәләренә нигезләнеп эшләнгән.
Спектакльдә уйнаучы актерлар – Лия Вилданова, Резедә Сәлахова, Артем Пискунов, Илфак Хафизов, Булат Зиннәтуллин, - Тинчурин театрының баш режиссеры Татарстан Республикасының Атказанган сәнгать эшлеклесе, Россия Федерациясенең Атказанган артисты Рәшит Заһидуллин шәкертләре. Ул Сәнгать академиясендә дә, театр училищесында да актерлык осталыгы буенча үз курсын алып бара.
“Сөй гомерне!” спектакле 21 гыйнварда Рус фән һәм мәдәният үзәгендә күрсәтеләчәк. Киләсе көнгә Малин шәһәрендә татар диаспорасы белән иҗади очрашу планлаштырылган, аның барышында Казан артистлары концерт куячак. Ә өченче көндә инде, «Tatars in Belgium» рәисе Лилия Вәлиева сүзләренә караганда, бельгиялеләр Татарстан артистларын Европа сый-хөрмәтенең бөтен кануннарына туры китереп, экскурцияләр һәм өчпочмаклар белән кунак итәчәк. Татар ризыклары җирле татарлар аша инде халыкара мәйданга чыкты.
Гастрольләрне, Россия Федерациясенең Бельгиядәге Илчелеге, Татарстан Республикасы Мәдәният министрлыгы ярдәме белән, “Татарлар Бельгиядә” берлеге оештырды.