Владивостокта сәүдә-икътисад, фән-техника һәм социаль-мәдәни өлкәләрдә хезмәттәшлек турында килешүгә кул куйдылар.

2011 елның 26 ноябрендә Татарстан Республикасы Президенты Рөстәм Миңнеханов һәм Приморье крае губернаторы Сергей Дарькин Владивостокта сәүдә-икътисад, фән-техника һәм социаль-мәдәни өлкәләрдә хезмәттәшлек турында килешүгә кул куйдылар.
Шулай ук 2012 елның июнь ахырында Владивостокта федераль Сабантуй уздыру турындагы килешүгә кул куелды. Владивостокта мәчет төзү өчен җир бүлеп бирү мәсьәләсе дә каралды. Төзелешне Татарстан алып барачак.
Шул ук көнне Приморьеның М.Горький исемендәге академия край драма театрында Татарстан сәнгать осталары зур концерт күрсәтте. Аңа Ерак Көнчыгышның төрле почмакларыннан татарлар һәм башкортлар – Сахалиннан, Хабаровск краеннан татар җәмгыятьләре вәкилләре җыелды.
Концертка Россия хөкүмәтенең беренче вице – премьеры Игорь Шувалов килде. Ул тамашачыларга татарча “Исәнмесез” дип эндәште һәм бу көчле алкышларга сәбәп булды. Аның белән концертны Татарстан Республикасы Президенты Рөстәм Миңнеханов, Приморье губернаторы Сергей Дарькин, Татарстан Республикасы мәдәният министры Айрат Сибәгатуллин карады. «Казан» бию ансамбленең, «Казан нуры» халык уен кораллары оркестрының, татар эстрадасы артистларының чыгышын тамашачылар җылы кабул иттеләр.
Театр холлында Татарстан турында фотокүргәзмәләр, шулай ук татар халык гамәли сәнгате күргәзмәсе оештырылды. Концертка килгән кунакларга Татарстан турындагы китаплар һәм журналлар тәкъдим ителде.

"Азатлык" радиосы:
http://www.azatliq.org/content/article/24406733.html
http://www.azatliq.org/audio/audio/334994.html

Татарстан Республикасы Мәдәният министрлыгының Матбугат хезмәте