Казанда Н.Лобачевский исемендәге Халыкара шигъриять фестивале узачак

2011 елның 2-4 декабрендә Казанда Н.Лобачевский исемендәге Халыкара шигъриять фестивале узачак.
Фестиваль программасында күренекле шагыйрьләр Евгений Рейн (Мәскәү), Равил Бохараев (Лондон), Лидия Григорьева (Лондон), Владимир Берязев (Новосибирск), Елена Исаева (Мәскәү), Елена Иванова-Верховская (Мәскәү), Вадим Месяц (Мәскәү-Нью-Йорк), Александр Кабанов (Киев), Евгений Чигрин (Мәскәү), Алексей Остудин (Казан), Андрей Коровин (Мәскәү) һәм башкалар белән иҗади очрашулар каралган.
«Влияние неевклидовой геометрии на художественное сознание» (“Геометриянең сәнгатьчә фикерләүгә йогынтысы”) дигән фәнни-гамәли конференциядә күренекле математиклар, философлар, дин әһелләре, шагыйрь, музыкант, тел белгечләре чыгыш ясый.
Россия язучылар союзының 20 еллыгына һәм «Дружба народов» журналының 70 еллыгына багышланган кичәдә күренекле шагыйрь, прозаик, РЯС рәисе Светлана Василенко РЯС әгъзалары булган шагыйрьләр иҗатын тәкъдим итәчәк, шулай ук үзенең яңа чәчмә әсәрләре белән таныштырачак.
Калын әдәби журналлар һәм аларның авторлары белән күренекле шагыйрьләр Владимир Берязев ( «Сибирские огни» журналы баш мөхәррире), Евгений Степанов ( «Дети РА», «Зинзивер» һ.б. журналлар баш мөхәррире), Александр Кабанов («ШО» журналы баш мөхәррире), прозаик Фәрит Нәгыйм («Дружба народов» журналы баш мөхәрриренең урынбасары) таныштыра.
Россиядәге һәм БДБ илләрендәге фестиваль хәрәкәте турында күренекле шагыйрь, Халыкара Волошин премиясе һәм халыкара фәнни-иҗади «Волошинский сентябрь» һәм кайбер башка фестивальләр координаторы Андрей Коровин сөйли.
Мәскәү шагыйрьләре исеменнән Ганна Шевченко, Александр Герасимов, Наталия Елизарова чыгыш ясый. Шигырь бәйрәмендә Иркутск шагыйрьләре Андрей Сизых һәм Светлана Михеева катнаша. Казан шагыйрьләре Анна Русс, Нури Бурнаш, Алёна Кәримова, Тимур Алдошин, Лилия Газизова һ.б. үз шигырьләрен укый.
Фестивальдә катнашучыларны Фәрит Гобәев белән Ленар Гыйльметдиновның «Казанские силуэты» (“Казан силуэтлары”) дигән фотосурәтләр күргәзмәсе, Казан университеты музее һәм В. Аксёнов музее, Казан Кремле буйлап сәяхәт көтә.
Фестиваль «Канәфер» иҗади башлангычларга ярдәм фонды тарафыннан Татарстан Республикасы Мәдәният министрлыгы, Татарстан Республикасы Язучылар берлеге, Казан федераль университетының Н. Лобачевский исемендәге фәнни китапханәсе, В. Аксёновның музей-йорты булышлыгы белән уздырыла.
Барлык чараларга керү ирекле.
Проект авторы һәм фестиваль координаторы Лилия Газизова
ligazizova@mail.ru, т. +7 960 047 16 12

Татарстан Республикасы Мәдәният министрлыгының Матбугат хезмәте