Татарстан Республикасы сәнгать осталары Владивостокта чыгыш ясый

Программа рус, татар һәм чит ил композиторларының иң яхшы әсәрләреннән төзелгән. Концертны Татарстан Республикасының халык артистлары Илфат Габдрахманов Һәм Эльза Әхмәтҗанова алып бара.
Владивосток тамашачысы алдында республиканың моңлы тавышлы мәшһүр җырчылары чыгыш ясый. Алар арасында Татарстан Республикасының Халык артистлары Резеда Галимова, Зәйнәп Фәрхетдинова, Зөфәр Билалов, Татарстан Республикасының Атказанган артистлары Гөлшат Имамиева, Рөстәм Асаев, Рәсим Низамов, Георгий Ибушев, Николай Коновалов, Владимир Васильев, Рөстәм Маликов, Илүсә Хуҗина, Артур Исламов, «Классик коллекшн» триосын атап китәргә кирәк.
Россия һәм халыкара фестивальләре лауреаты «Казан» бию ансамбле чыгышы нур өстенә нур булачак. Бу коллектив 11 элек Казан шәһәрендә профессиональ бию сәнгатен үстерү, Татарстан халыклары фольклор биюләрен һәм заманча хореография казанышларын киң пропагандалау максатларында оештырылды. Ансамбльнең җитәкчесе – Татарстан Республикасының Атказанган артисты Чулпан Закирова.
Яшь коллектив булуына да карамастан, бию ансамбле үзенең төп максатына – бию, музыка, җыр, театр, мода һәм шигъриятьне берләштереп, борынгы тарихка һәм вакытның тиз үзгәрүчән күптөрлелегенә үзенчәлекле мөнәсәбәтен чагылдыруга уңышлы ирешә килә. Иҗат чорында ансамбль тамашачыларны үзенең осталыгы, виртуаль балет техникасы, яшьлек дәрте белән җәлеп итте.
«Казан» бию ансамбле «Казан нуры» халык уен кораллары оркестры белән иҗади хезмәттәшлектә эшли. Оркестрның җитәкчесе – Татарстан Республикасының Атказанган артисты Рәсим Ильясов. Коллективның бай репертуарын татар, рус, яһүд, төрек, әрмән халык көйләре, Европа, рус һәм ансамбль белән оркестр өчен махсус музыка иҗат итүче татар композиторларының академик инструменталь һәм вокаль музыкасы тәшкил итә. «Казан нуры» халык инструментлары оркестры - Россия халыкларының милли уен кораллары оркестрлары һәм ансамбльләренең бөтенроссия фестиваль-конкурсы лауреаты.

Татарстан Республикасы Мәдәният министрлыгының Матбугат хезмәте