«Казан» милли мәдәният үзәге Альфрид Шәймәрдановның “Мәңгелек бәхет” дип аталган “самими” рәсем сәнгате әсәрләреннән төзелгән шәхси күргәзмәсен тәкъдим итә

17 ноябрьдә 16.00 сәгатьтә «Казан» милли мәдәният үзәгендә Альфрид Шәймәрдановның “Мәңгелек бәхет” дип аталган “самими” рәсем сәнгате әсәрләреннән төзелгән шәхси юбилей күргәзмәсе ачыла.
«Самими рәсем сәнгате» стиле сәнгать дөньясында шактый сирәк күренеш. Альфрид Шәймәрданов – Татарстанда бу юнәлештә иҗат итүче һәм Татарстан Республикасын Россиядә һәм чит илләрдә лаеклы тәкъдим итүче аз санлы рәссамнарның берсе.
Альфрид Шәймәрданов үз картиналарында символик образлар аша “шушы вакытта һәм шушы урында барган” тарихи күренешләрне тасвирларга омтыла, Вакыт, Туган иле, туган Халкы турында бәян итә.
Шәймәрданов Альфрид Муллахмәт улы 1961 елның 31 гыйнварында ТАССРның Саба районы Сабабаш авылында туа. Ленинградның кино инженерлары институтын тәмамлый. 1988 елдан 1991 елга кадәр Казан кинохроника студиясендә эшли. Үзенең беренче картинасын А.Шәймәрданов 1993 елда яза һәм шуннан бирле үзен тулысынча сынлы сәнгатькә багышлый. Аның эшләре 1997 елда беренче тапкыр Братислава шәһәрендә (Словакия) узган Бөтендөнья самими сәнгать күргәзмәсендә куела. Шәхси күргәзмәләре шулай ук Үзәк Рәссамнар йортында (Мәскәү), Германия, Литва, Болгария Илчелекләрендә уза. 2001 елның июнендә Казанга Бөтендөнья мирасы шәһәрләре оешмасы әгъзалыгына сертификат тапшыру чаралары кысаларында ЮНЕСКО генераль директоры М.Бушенакига ЮНЕСКОга бүләк сыйфатында «Бәрәңге, Горбачев сорты» картинасы бирелә. А.Шәймәрданов Россия Рәссамнар берлеге әгъзасы, Казанда яши һәм иҗат итә.
ТР Мәдәният министрлыгының Матбугат хезмәте