Татарстан артистлары хәйрия концертларын дәвам итә
Татарстан артистлары Яшел Үзәннең психоневрологик интернатында һәм Казанның Анжела Вавилова исемендәге балалар хосписында чыгыш ясады. Ике концерт та Татарстан Мәдәният министрлыгы иҗат коллективлары белән берлектә гамәлгә ашыра торган “Йөрәктән - йөрәккә” хәйрия акциясе кысаларында узды.
Яшел Үзән психоневрологик интернатына «Crystal» шоу-балеты, Алмаз Әхмәтҗанов (аккордеон), Әмир Әхмәдишин (вокал), Владимир Голяндин (фокусчы) барды. Артистлар көчле алкышлар һәм елмаюлардан тыш, Рәхмәт хатларын да лаек булды.
Ә ТР Дәүләт җыр һәм бию ансамбле Казандагы Анжела Вавилова исемендәге балалар хосписында чыгыш ясады. К.Тинчурин театры артистлары исә башкаланың “Дуслык” социаль-тернәкләндерү үзәгендә булды. Актерлар балаларга татлы бүләкләр һәм киемнәр тапшырды.
Киләсе хәйрия концерты Казан психоневрологик интернатында узачак.