Лена Шагыйрьҗанга Татарстан Республикасының Халык шагыйре исеме бирелде
Нәфис әдәбиятны үстерүгә зур шәхси өлеше өчен Шакирҗанова Лена Галимҗан кызына Татарстан Республикасы Президенты Указы нигезендә «Татарстан Республикасының Халык шагыйре» исеме бирелде. Олы бүләкнең таныклыгын Лена ханымга аның туган көне – 4 июньдә Татарстан Республикасы мәдәният министрының беренче урынбасары Эльвира Камалова тапшырды.
Белешмә өчен. Лена Галимҗан кызы Шакирҗанова 1945 елның 4 июнендә ТАССРның Актаныш районы Пучы авылында укытучы гаиләсендә туган. Бала чагы һәм мәктәп еллары Татарстанның Арча районы Күлле Киме авылында уза, шунда 1962 елны урта мәктәпне тәмамлый. 1967 елда Казан дәүләт педагогика институтының татар теле һәм әдәбияты бүлеген тәмамлагач, Л.Шакирҗанова бер ел Казан шәһәренең 80нче мәктәбендә укытучы, аннары, 1968-1973 елларда, Татарстан дәүләт җыр һәм бию ансамблендә җырчы-артистка булып эшли. 1974 елда ул Татарстан радиокомитетына тәрҗемәче хезмәтенә күчә. 1984 елдан – ТР Язучылар берлеге әгъзасы.