Аяз Гыйләҗев исемендәге Яр Чаллы дәүләт татар драма театры Мари Ил Республикасына гастрольгә бара
2026 елның 8-10 апрелендә Аяз Гыйләҗев исемендәге Яр Чаллы дәүләт татар драма театры «РОСКОНЦЕРТ» ФДБМК гамәлгә ашырган «Зур гастрольләр» федераль программасында катнаша. Гастрольләр Йошкар-Оладагы М. Шкетан исемендәге Мари дәүләт драма театры сәхнәсендә узачак.
Чаллы театры Мари Ил Республикасы башкаласының кунакларына һәм халкына үз репертуарыннан өч төрле жанрдагы спектакль тәкъдим итәчәк:
· 8 апрель — «Яшь йөрәкләр» музыкаль комедиясе;
· 9 апрель — «Алтын алка» драмасы;
· 10 апрель — «Без – 41 нче ел балалары» драмасы.
Барлык куелышлар татар телендә бара. Тамашачыларга уңайлык өчен рус теленә синхрон тәрҗемә оештырылган. Тәкъдим ителгән яшь чикләве — 12+.
Гастроль афишасы заманча татар театрының барлык байлыгын күрсәтү өчен төзелгән: җиңел музыкаль комедиядән алып, тарихи материалга һәм буыннар хәтеренә нигезләнгән тирән психологик драмаларга кадәр.
Билетларны М. Шкетан исемендәге Мари дәүләт драма театры кассасында һәм аның рәсми сайтында сатып алып була.