Татарстанда мәдәният өлкәсе җитәкчеләре өчен беренче тапкыр «Мәдәнияттә менеджмент» МВА программасы ачылды
Әлеге программа бүген ачылды, анда ТР мәдәният министры Ирада Әюпова да катнашты. Ул программаның мөмкинлекләре, үзенең шәхси уку тәҗрибәсе турында сөйләде, тыңлаучыларга укуларында уңышлар теләде.
Әлеге курс Казан (Идел буе) федераль университетының югары бизнес мәктәбе базасында тормышка ашырыла. Дәресләрнең беренче циклы 2021 елның 15-17 октябрь көннәрендә узачак.
Агымдагы елның июль аенда конкурс нигезендә 20 тыңлаучы сайлап алынды, алар арасында музей, театр, китапханә, ресурс үзәкләре, мәдәният йортлары җитәкчеләре, креатив индустрия вәкилләре бар иде.
Хәзер әлеге студентларны 2 еллык интенсив уку көтә. Уку тәмамлан һәм имтихан сессиясен уңышлы тапшырганнан соң студентлар МВА дәрәҗәсен алу турында Казан (Идел буе) федераль университеты дипломын һәм Халыкара МВА Ассоциациясе сертификатын алачаклар.