Күренекле кинематографист Әнвәр Габдрахманов вафат булды

67нче яшендә режиссер, архитектор, Россия Федерациясенең Кинематографистлар берлеге әгъзасы Әнвәр Габдрахманов вафат булды.

Татарстан Республикасы Мәдәният министрлыгы Әнвәр Габдрахмановның туганнары һәм якыннарының тирән  кайгысын уртаклаша.

 Әнвәр Габдрахманов 1953 елның 18 апрелендә Кабардин-Балкар АССР Терек шәһәрендә туа. 1960 елда әти-әнисе белән Казанга күчеп килә,  урта белемне ул биредә ала. Балачактан рәсем, музыка һәм фотосүрәтләр белән мавыга  һәм инде бу яшьтә үк аның иҗади сәләте булуы күренә. 1967 елда, талантлы оста һәм педагог Камил Хәсән улы Тахтеев җитәкчелегендәге фототүгәрәктә  шөгыльләнеп, укучылар арасында үткәрелгән республика фоторәсемнәр конкурсында беренче урын ала. 1970 елда Әнвәр Габдрахманов Казан инженер-төзелеш институтына архитектура факультетының көндезге бүлегенә укырга керә. 1975 елдан башлап скульптор Илдар Ханов янында архитектор һәм рәссам булып эшли. Шул ук вакытта Казан кинохроника студиясендә танылган кинодокументалист Валентин Кузьмин янәшәсендә оператор ярдәмчесе булып эшли. Биредә ул  1977 елда документаль фильм операторы буларак үзенең беренче «Хореографическое  училище» дип аталган сюжетын төшерә.  1979 елда Бөтенсоюз дәүләт кинематография институтында операторлык  факультетының көндезге бүлегендә Ленин премиясе лауреаты В. В. Монаховның остаханәсендә укуын дәвам итә. ВГИКны тәмамлаганнан соң, Казан кинохроника студиясенә кайта. Тәҗрибәле режиссер һәм оператор булып танылган елларда «Таң» киновидеостудиясен җитәкли башлый.

Әнвәр Габдрахманов - Казан һәм Татарстан Республикасының танылган кешеләренә багышланган документаль фильмнар авторы. Аның геройлары - сәясәтчеләр, язучылар, мәдәният һәм сәнгать эшлеклеләре. Үз картиналарының күбесендә ул бер үк вакытта сценарист, режиссер, оператор һәм продюсер була.

Югары осталык һәм намуслы хезмәте өчен Әнвәр Габдрахмановка Россия Федерациясе Мәдәният министрлыгының «Озак еллар һәм нәтиҗәле хезмәте өчен» Мактау грамотасы (2001 ел), «Россиянең мактаулы кинематографисты» күкрәк билгесе (2003 ел), «Татарстан Республикасының атказанган сәнгать эшлеклесе» мактаулы исеме (2013 ел), «Казанның 1000 еллыгы истәлегенә» медале (2006 ел) тапшырылды.  Әнвәр  Габдрахманов - милли мәдәниятләр турындагы документаль кинога багышланган  «Евразия калейдоскобы» халыкара фестиваль-конкурсы лауреаты (2008), иң яхшы режиссерлык эше (2007, 2008), иң яхшы оператор эше өчен дипломнар иясе (2007).

Фильмография:

• 1994 «Я люблю людей» (Татарстанның беренче Президенты турындагы) док.кинофильм (режиссер, оператор)
• 1995–2001 «Сага древних Булгар» тулы метражлы  6 фильм (оператор-постановщик)
• 1998 «Древо жизни Ильдара Ханова» док. кинофильм (режиссер, оператор)
• 1999 «Хасан Туфан» док. кинофильм (оператор)
• 2001 «Династия художников Якуповых» док. кинофильм (режиссер, оператор)
• 2004 «Сельская учительница» док. кинофильм (режиссер, продюсер)
• 2005 «Музей-заповедник «Казанский Кремль» (Студия «Таң») док. кинофильм (сценарист, режиссер, оператор, продюсер)
• 2005 «Культовое зодчество Казани» док. кинофильм (режиссер, оператор, продюсер)
• 2006 «Парад-Алле!» (Студия «Тан») док. кинофильм (сценарист, режиссер, продюсер)
• 2007 «Азан в душе» (Студия «Тан») док. кинофильм (сценарист, режиссер, оператор, продюсер)
• 2009 «Полеты Фаниса Яруллина» (Студия «Тан») док. кинофильм (сценарист, режиссер, оператор, продюсер)
• 2009 «Школьные подруги» игровой фильм (продюсер)
• 2010 «Восьмиузорное полотенце» (Студия «Тан») док. фильм (сценарист, режиссер, оператор, продюсер)
• 2010 «Вклад Татарстана в победу в Великой Отечественной войне» (Студия «Тан») док. фильм (сценарист, режиссер, оператор, продюсер)
• 2010 «Встречи с Альфией Авзаловой» (Студия «Тан») док.фильм (сценарист, режиссер, оператор, продюсер)
• 2011 «Нинель Юлтыева» (Студия «Тан») док. фильм (сценарист, режиссер, оператор, продюсер)
• 2013 «Неугасимый огонь Абдурахмана Абсалямова» (студия «Тан») док. фильм (режиссер, оператор, продюсер)
• 2014 «Право на «Голос» (Татарстаннан «Голос» тапшыруында катнашкан 16 җырчы  турында (студия «Таң») док. фильм (сценарий, режиссер, оператор, продюсер)
• 2015 «Истории успеха, способные вдохновлять» (студия «Таң») док. фильм (сценарий, режиссер, оператор, продюсер)
• 2015 «Тайна Казанского золота» (студия «Таң») док. фильм (режиссер, оператор, продюсер)

Кинодокументалистның соңгы эше М. Девятаевка багышланган «Крылатая Казан» фильмы булды.