Татарстан Республикасы Мәдәният министры Айрат Сибагатуллин Төркия Республикасында берничә очрашу уздырды

Министр 12-14 апрельдә Төркия Республикасында, Әнкарә, Истанбул шәһәрләрендә эш сәфәрендә булды. Айрат Сибагатуллин Төркия Республикасының мәдәният һәм туристлык министры Эртогрул Гюнай, Халыкара төрки мәдәниятләр оешмасы (ТЮРКСОЙ) генераль секретаре Дюсен Касеинов, башка рәсми затлар белән очрашты. Очрашуларда Татарстан Республикасының Төркия Республикасындагы Вәкаләтле вәкиле Радик Гыйматдинов катнашты.
Визит программасы 12 апрельдә Әнкарәдә Габдулла Тукай бюстына чәчәк кую белән ачылды. Шуннан соң ук Россия Федерациясенең Төркия Республикасындагы Илчесе В.Е.Ивановский, Төркиянең мәдәният һәм туристлык министрлыгы җитәкчелеге вәкилләре белән очрашып, Татарстан Республикасының Төркиядә булачак мәдәни чараларын оештыру детальләре буенча фикер алышынды.
Төркиядә Татар музыкасы атналыгы уздыру, Татарстан Республикасында мәшһүр Тупкапы музее коллекциясеннән күргәзмә оештыру, Истанбулның үзәк Солтанәхмәт мәйданында Сабантуй уздыру, Төркия башкаласындагы Габдулла Тукай паркын тагын да төзекләндерү, 2012 елда Казанда классик төрек сәнгате күргәзмәсе оештыру, җавап итеп Истанбулда татар декоратив сәнгате экспозициясен тәкъдим итү турында килешенде.
Төркия Республикасына визит Габдулла Тукайга багышланган кичә белән тәмамланды. Ул Татарстан Республикасының Төркия Республикасындагы Вәкаләтле вәкиллеге тарафыннан Истанбулда Идел-Урал татарлары мәдәни җәмгыяте белән берлектә оештырылды.