Ислам мәдәнияте музее «Казан: ислам мотивлары» дигән күргәзмә уздыра

Экспозициядә Н.И.Фешин исемендәге Казан сәнгать мәктәбе укытучыларының һәм студентларының эшләре куелган. Аларда Татарстан башкаласының борынгы йөзе, Казан тарихының мөһим чорлары, шәһәрнең борынгы һәм хәзерге мәчетләре сурәтләнгән.
Тамашачылар Казан ханлыгы чорында борынгы Казан урамнары, Сөембикә патшабикәнең мәгърур образы, “Ташаяк” базары, Иске Татар бистәсе һәм Кол Шәриф җамигъ мәчете сурәтләнгән картиналар күрәчәк.
Татарстан Республикасы Атказанган сәнгать эшлеклесе А.Г. Хәмидуллинның, О.А. Гыйльметдинованың укучылары иҗаты да тамашачыда кызыксыну уятыр.
Шәһәр образын стильләштерүне, дизайнерларча карашны кунаклар Сержантова О.В., Федорова В.К., Лопаткина А.Н. укучылары эшләрендә күрә ала.
Декоратив-гамәли сәнгать юнәлеше Татарстан Республикасының Атказанган сәнгать эшлеклесе А.А. Җәмилова җитәкчелегендә башкарылган эшләр – күн мозаикасы, тирене тыгызлап һәм яндырып бизәк төшерү – аша күрсәтелә.