Татарстан Республикасы Милли музее «Музей капкасына гол» проектын гамәлгә ашыра

17 ноябрьдә 15.00 сәгатьтә ТР Милли музееның конференцияләр залында «Современник» («Замандаш») клубы утырышы булачак.
Татарстанда һәм Россиядәге хәзерге тормышны спорттан башка күз алдына китереп булмый. 2013 елгы Универсиада һәм аның артыннан Сочидагы Олимпиада якынлаша. Россиянең һәм Татарстанның спортта зур казанышлары һәм җиңүләре бар. Спортта югары казанышларга ирешү өчен күп эшләргә, нык ихтыяр көченә ия булырга кирәк, шулай да безнең арада Олимпия уеннарында җиңү яулаучылар бар!
Зур спорт чаралары алдыннан ТР Милли музее “Музей капкасына гол” проектын гамәлгә ашыра, әйдәүче спортчылар һәм командалар коллекцияләре туплый, Татарстанда спорт казанышларына һәм үсешенә багышланган очрашулар һәм күргәзмәләр оештыра.
Музейдагы әлеге очрашуның герое – Татарстанның мәшһүр спортчыларыннан булган фехтование остасы Валентина Геннадьевна Никонова. Күп еллар дәвамында ул фехтованиедә зур казанышларга ирешә, 35 ел элек Монреаль Олимпиадасында алтын медаль яулый.
Бер спорт мәктәбе һәм бер тренер Житлов Владимир Васильевич тәрбияләгән спортчы-фехтовальщикларның Татарстан һәм Советлар Союзы өчен күрелмәгән уңышлары Валентина Никонова исеме белән бәйләнгән. Казан фехтованиесе 1976 елда, Монреальдәге XXI Олимпия уеннарында Казаннан берьюлы өч фехтовальщица алтын медаль яулап алгач, үзенең иң югары үсеш ноктасына ирешә.
Утырышка күргәзмә әзерләнгән, анда музей тупланмаларыннан экспонатлар – фотографияләр, рапира, грамоталар, сувенирлар куелган. Очрашу кысаларында Валентина Геннадьевна шәхси архивыннан экспонатлар тапшырачак, алар арасында - медальләр, грамоталар, аның «Что было, то было…» (“Булганы булды...”) дигән китабы бар.
Очрашуда 2013 елгы Универсиаданы әзерләү һәм уздыру комитеты вәкилләре, спортчылар, мәктәп укучылары, музей хезмәткәрләре катнашачак.
Татарстан Республикасы Мәдәният министрлыгының Матбугат хезмәте