Татарстан Республикасы Сынлы сәнгать музее Роберт Фальк рәсемнәрен күрсәтәчәк

9 ноябрьдә 16.00 сәгатьтә Татарстан Республикасы Дәүләт Сынлы сәнгать музеенда Роберт Фалькның «Чорның буталчык стенограммасы…» дигән рәсемнәр күргәзмәсе ачылачак. Ул рәссамның тууына 125 ел тулуга багышлана.
Музей күргәзмәне Мәскәүнең сынлы сәнгать әсәрләре коллекцияләүчеләр клубы белән берлектә оештырган, анда ТР ДССМ тупланмаларыннан һәм Мәскәүнең шәхси коллекцияләреннән 67 рәсем куелган.
Роберт Рафаилович Фальк (1886-1958) –ХХ гасырның күренекле рәссамы, аның сәнгать өлкәсендәге үз чорына хас эзләнүләрне, каршылыкларны һәм казанышларны чагылдырган иҗаты Россия һәм дөнья сәнгатенең аерылгысыз бер өлешенә әверелде. Сәнгать тарихына барыннан да элек «Буби валеты» вәкиле буларак кереп калган Фальк, киндердә һәм кәгазь битләрендә яңа сәнгати чынбарлыкны чагылдырырга тиешле үз алымын булдыра, авторның фәлсәфи уй-фикерләрен ача, дөньяның җанлы сурәтен тасвирлый барып, сәнгатьтә һәрчак үзенә генә хас аерым юл эзләде. Картиналары белән чагыштырганда ярдәмчел роль уйнаса да, рәсемгә Фальк бөтен иҗат дәверендә тугры кала, аңа мөстәкыйль сәнгати мәгънә сала. Күргәзмә экспонатлары останың 1900 еллардан – өйрәнчеклек чорыннан башлап 1950 елларгача - өлгергәнлек һәм йомгаклау чорынача булган озын иҗади юлын яктырталар, 1910 елгы шау-шулы “бубивалетчылыгы”, 1920 елгы фәлсәфәчелеге, 1930 елгы лириклыгы белән таныштыралар; рәссамнең тормыштан алган төрле тәэсирләрен һәм ул яшәгән Мәскәү, Париж, Кырым, Урта Азия, Башкортстан белән бәйле киң географиясен чагылдыралар.
ТР Мәдәният министрлыгының матбугат хезмәте