Казанда «Туым Җондозы» «Туым Җондозы»» керәшен җырлары конкурсы җиңүчеләре мәгълүм

Мамадыш районының Дүсмәт авылы “Тәңкәләр” фольклор ансамбле «Туым Җондозы» – «Рождественская звезда» – 2017» керәшен җырларын яшь башкаручыларның конкурс-фестиваленең гала-концертыннан гран-при алып кайтып китте.

Яшь артистларга дипломны һәм 30 мең сумлык сертификатны Татарстан Республикасы керәшен иҗтимагый оешмасы җитәкчесе Иван Михайлович Егоров тапшырды.

Жюри рәисе - Татарстанның атказанган сәнгать эшлеклесе, фольклорчы галим, сәнгать фәннәре кандидаты, Казан консерваториясе доценты Геннадий Макаров «Туым Җондозы» конкурс-фестиваленең сыйфаты яхшыруын билгеләп үтте. “Катнашучыларны кайчакта конкурстан “Бар, әбиеңнән өйрәнеп кил!” - дип кайтарып җибәрәбез. Алар икенче елны өйрәнеп киләләр дә җиңеп кайтып китәләр”, - дип белдерде  Геннадий Егоров.

Исегезгә төшерәбез: фестиваль тугызынчы ел рәттән үткәрелә. Фестиваль-конкурста солист-вокалистлар, фольклор ансамбльләре һәм этник музыка коралларын ясаучылар катнаша. Беренче сайлап алу турлары Балык Бистәсендә, Балтачта, Кайбычта, Чаллыда hәм Казанда үткәрелде, дип хәбәр итә Татарстан Халыклар дуслыгы йорты матбугат хезмәте.