Казанда «Җиһанда гүзәллекне арттырыйк!» дигән күргәзмә ачылды

24 декабрьдә Татарстанның Халыклар дуслыгы йортында Ял көне рәссамнары хәрәкәтенең еллык өченче күргәзмәсе ачылды.   

Анда буяу, акварель белән ясалган кырыктан артык картина куелган.   «Ял көне рәссамнары» - иҗат белән һөнәри нигездә шөгыльләнмиләр, картиналар ясау – алар өчен өстәмә шөгыль.  Алар үз картиналарын буяу, йон-мамык, иннек-кершән белән дә ясыйлар. Төп кагыйдәләре – бернинди кагыйдәләргә дә буйсынмау. Бу күргәзмәгә эшләр берничек тә сайлап алынмаган. «Без һөнәри рәссамнарның «басуына» керергә уйламыйбыз да, – ди Светлана Шәвәлиева – «Ял көне рәссамнары» республика иҗтимагый хәрәкәте Советы рәисе, – Безнең андый ук осталыгыбыз да юк, аның каруы хис-тойгыларыбыз ташып тора».

Күргәзмә 2014 елның 20 гыйнварына кадәр дәвам итәчәк.

Татарстан Республикасы Мәдәният министрлыгының Матбугат хезмәте