Рәссам Александр Простов-Покровский вафат

3 майда, тормышының 76нчы елында, Сальвадор Дали Кубогы иясе, рәссам Александр Простов-Покровский вафат булды. Мәрхүмне озату 5 майда сәгать 12:00дә Сандецкий утары паркында (ТР ДМИИ Баш бинасы) узачак.

Александр Евгеньевич Простов-Покровский 1951 елның 9 мартында Казанда туды.

Россия рәссамы, график, сценограф, куючы рәссам. Театр эшлеклеләре гаиләсендә туган: әтисе, Евгений Александрович, Качалов театрының баш режиссёры булган, әнисе, Нина Ивановна Юдина, шул ук театрның актрисасы булган.

Александр Евгеньевич Простов-Покровский иҗаты — постсовет мәйданының мөһим сәнгать күренеше. Аның эшләре традицияләрне һәм заманчалыкны тирәнтен аңлау нәтиҗәсе генә түгел, ә рәссам фәлсәфәне, театраллекне һәм визуальлекне берләштергән шәхси әйтү дә.

Рәссамның күргәзмәләре Германиядә, Ирландиядә, Мальтада, Чехиядә, Словакиядә, Болгариядә, Төркиядә, Сербиядә һәм Россиядә узды. Простов-Покровский эшләре Дублиндагы Заманча сәнгать музеенда (Ирландия), Дублиндагы «Ориджин галери»да, Ганновердагы Шпренгель-музеенда (Германия), Прагадагы Масарик исемендәге Сәнгать академиясендә (Чехия) саклана.

Александр Евгеньевич Простов-Покровский Сальвадор Дали Кубогы, Франц Кафканың Европа түгәрәгенең Алтын медале, «Казанның 1000 еллыгы истәлегенә» медале белән бүләкләнгән.
Татарстан Республикасы Мәдәният министрлыгы Александр Простов-Покровскийның туганнарына, якыннарына, хезмәттәшләренә һәм барлык талант сөючеләренә чын күңелдән кайгы уртаклаша.