«Дуслык һәм татулык дәресләре» проектының язгы сезоны башланды
Татарстан Халыклар Дуслыгы Йортында «Дуслык һәм татулык дәресләре» дигән интерактив мәдәни-белем бирү проектының язгы сезоны башланды.
Болар — милләтара татулыкны формалаштыруга юнәлдерелгән уникаль ачык дәресләр.
Проектның максаты — үсеп килүче буында Россия халыклары мәдәниятләренә хөрмәт һәм кызыксыну тәрбияләү, гомумроссия гражданлык идентиклыгы формалаштыру.
Проект «Гаилә» милли проектының «Гаилә кыйммәтләре һәм мәдәният инфраструктурасы» федераль проектының һәм «Яшьләр һәм балалар» милли проектының максатларына һәм бурычларына туры килә.
«Дуслык һәм татулык дәресе» кысаларында укучыларга төрле милләт балалары арасындагы мөнәсәбәтләр темасына кыска метражлы фильмнар күрсәтелде, аннары интерактив викторина узды. Иң актив катнашучылар истәлекле бүләкләр алды.
Фикер алышканнан соң, балаларга Халыклар Дуслыгы Йортының иҗат коллективлары катнашында күпмилләтле концерт программасы тәкъдим ителде.
Укучылар шулай ук Халыклар Дуслыгы Йортының яңартылган күргәзмә залында тәкъдим ителгән Казан Идел буе халыкларының традицион костюмнары экспозициясендә булдылар.
Аннары укучылар Казанның Күпмилләтле якшәмбе мәктәбенең белем бирү процессы белән таныштылар, анда төрле милләт балалары туган телләрен, үз халыкларының мәдәниятен һәм традицияләрен өйрәнәләр.
Проект тулы күләмдә 2016 елдан бирле Дуслык Йорты базасында гамәлгә ашырыла. Уздырылу вакыты эчендә Татарстан халыклары Ассамблеясының милли-мәдәни автономияләре эшчәнлеге, республикада яшәүче халыклар һәм безнең җәмгыятьтә тынычлык һәм татулыкны саклау мөһимлеге турында 50 меңнән артык укучы белде.