Казанда Ф.И. Шаляпин исемендәге XLIV Халыкара опера фестивале уза
2026 елның 30 гыйнварыннан 2 мартына кадәр М. Җәлил исемендәге Татар академия дәүләт опера һәм балет театры сәхнәсендә Ф.И. Шаляпин исемендәге XLIV Халыкара опера фестивале уза.
Фестиваль программасын 30-31 гыйнварда режиссер Юрий Александров һәм рәссам Вячеслав Окунев куйган В.А. Моцартның «Фигаро туе» операсы премьерасы ачты. Исегезгә төшерәбез, 2026 елда В.А. Моцартның тууына 270 ел һәм аның данлыклы «Фигаро туе» операсы-буффасына 240 ел тула. Спектакльләрдә төп партияләрне Владимир Мороз (Мариин театры), Венера Гыймадиева (Түбән Новгород опера һәм балет театры), Артур Исламов, Эльза Исламова, Гурий Гурьев (НОВАТ), Никита Мухин (НОВАТ), Гөлнора Гатина, Венера Протасова, Вера Позолотина (Урал Опера) башкарды. Постановканың музыкаль җитәкчесе һәм дирижеры маэстро Юстус Франтц (Германия) булды.
Фестивальнең опера программасын рус һәм чит ил сәнгате шедеврларын тәкъдим итүче зур күләмле постановкалар дәвам итәчәк. Спектакльләрдә төп партияләрне Россиянең һәм чит илләрнең әйдәп баручы театрлары солистлары башкарачак. Башкаручыларның тулы составлары турында театрның рәсми сайтында укый аласыз.
Фестивальнең параллель программасы кысаларында Татарстан Республикасы Милли китапханәсендә мәгариф лекцияләре узачак.
Ф.И. Шаляпин исемендәге Халыкара опера фестивале Казанда 1982 елдан бирле уза. Иң борынгы Россия опера форумы М. Җәлил исемендәге ТАДОиБ директоры Рауфаль Мөхәммәтҗанов инициативасы белән оештырылган иде.