Бер дуслык тарихы: Муса Җәлил музеенда Нәҗиб Җиһановны искә алалар
29 гыйнварда Муса Җәлил музее-фатирында татар һөнәри музыкасына нигез салучыларның берсе, Казан консерваториясенә нигез салучы һәм аның беренче ректоры Нәҗиб Җиһановның тууына 115 ел тулуга багышланган «Кызыл ромашка» клубының чираттагы утырышы узачак.
Муса Җәлил һәм Нәҗиб Җиһанов 1930 еллар башында Мәскәүдә очрашалар һәм дуслашалар. Алар дуслар гына түгел, бу Татарстанның иң уңышлы иҗади тандемнарыннан берсе. Алар берничә музыкаль проект өстендә бергә эшлиләр. «Алтынчәч» операсы Нәҗиб Җиһанов музыкасына Муса Җәлил либреттосы белән язылган. Ул шулай ук Бөек Ватан сугышы турындагы беренче совет операларыннан саналган, премьерасы 1942 елда узган «Ильдар» операсына либретто язган. Соңрак Җиһанов шагыйрь язмышына багышланган «Җәлил» операсын иҗат итә.
Утырыш композиторның оныгы, Нәҗиб Җиһанов музее мөдире Алексей Егоров, Казан дәүләт консерваториясе, Казан дәүләт мәдәният институты һәм И.В. Әүхәдиев исемендәге Казан музыка көллияте студентлары һәм укытучылары катнашында узачак. Композитор турында истәлекләр, хатлардан өзекләр һәм Нәҗиб Җиһанов музыкасы яңгыраячак.
Очрашу башлана сәгать 14:00 да, керү ирекле.
Фотода – Муса Җәлил һәм Нәҗиб Җиһанов Васильевода «Алтынчәч» операсы өстендә эшлиләр. ТР Милли музее фондларыннан.