Чаллы курчак театры артистлары һәр якшәмбедә нәни тамашачыларга үз спектакльләрен Балалар театр сәнгате мәктәбендә күрсәтә
Чаллы курчак театры артистлары һәр якшәмбедә 10, 12, 14 сәгатьтә нәни тамашачыларга үз спектакльләрен Балалар театр сәнгате мәктәбендә күрсәтә. Ә эш көннәрендә театр балалар бакчаларында һәм мәктәпләрдә чыгыш ясавын дәвам итә.
3 ноябрьдә 10 сәгатьтә артистлар Балалар театр сәнгате мәктәбендә «Винни-Пух и все, все, все» спектаклен уйный.
Инглиз язучысы А.Милн әсәрләре нигезендә куелган, үтә мөлаем аю баласы һәм аның дуслары турында бәян ителгән күңелле әкият нәни тамашачыларның йөрәгенә хуш килә.
Винни-Пух һәм аның дусларының күңелле маҗаралары театр сәхнәсендә җанлы итеп күрсәтелә. Урманда яшәүче әкият каһарманнары бик еш кына төрле вакыйгаларга тарыйлар, әмма һәрвакытта да барысы да бик яхшы тәмамлана.
Спектакльгә 3 яше тулган һәм аннан өлкәнрәк балалар чакырыла.
Татарстан Республикасы Мәдәният министрлыгының Матбугат хезмәте