Шәриф Камал исемендәге әдәби премия лауреатлары игълан ителде
Казанда Шәриф Камал исемендәге әдәби премия лауреатлары игълан ителде. Бүләкләү тантанасы 28 февральдә Татар китабы йортында - Татар әдәбияты тарихы музее Шәриф Камал мемориаль фатирында үтте.
«Без әлеге премияне инде өченче ел тапшырабыз һәм ул Татарстан мәдәнияте өчен әһәмиятле. Шәриф Камал - гыйлемле язучы. Ул яшь авторларның остазы буларак, рус һәм дөнья классикасын татар теленә тәрҗемә итә. Ышанам, премия лауреатларыннан татар әдәбияты тәрҗемәчеләре һәм мәшһүр язучылар чыгачак», - дип билгеләп үтте Татарстан Милли музее филиалының Татар китабы йорты җитәкчесе Айдар Шәйхин.
Шәриф Камал исемендәге премияне Татарстан Милли музее 2020 елда республиканың Мәдәният министрлыгы ярдәмендә гамәлгә куйды. Премиягә 32 прозачы һәм 11 тәрҗемәче дәгъва кылды. Һәр номинациядә тәүге тапкыр яшь категорияләре аерым бәяләнде. Премиянең күләме - 50 мең сум.
«Проза» номинациясендә җиңүче дип Казаннан Светлана Мөхәммәдиева һәм КФУ ИСФНиМК беренче курс студенты Гөлназ Әхмәдиева табылды.
«Тәрҗемә» номинациясендә катнашучылар Шәриф Камалның «Ата» хикәясен инглиз, алман яки төрек телләренә күчерделәр. Иң яхшы эш дип Актаныш гимназиясе укытучылары - Марат Гыйметдинов һәм Ралия Зәйнуллина (Әнкара университеты, Төркия) тәрҗемәләре танылды.
Чараның иң дулкынландыргыч өлеше лауреатларның исемнәрен һәм аларның истәлекләр китабына теләкләрен кертү булды. Моның өчен Шәриф Камал яшәгән һәм иҗат иткән дәвердәге каләм кулланылды.