Татарстан Республикасы Мәдәният министрлыгының йомгаклау коллегиясендә Татарстан Республикасында Милли мәдәниятләр һәм традицияләр елы игълан ителде
Бүген 2023 елның 31 гыйнварында 14:00 сәгатьтә «Казан Экспо» Халыкара күргәзмәләр үзәгендә Татарстан Республикасы Мәдәният министрлыгының йомгаклау коллегиясе үтте, анда Татарстан Республикасында Милли мәдәниятләр һәм традицияләр елына старт бирелде.
Коллегиядә Татарстан Республикасы Президенты Рөстәм Миңнеханов, Россия Федерациясе мәдәният министры урынбасары Владимир Осинцев, «Роскультүзәк» ФБДУ директоры Марина Абрамова, РФ Президенты мәдәни инициативалар фонды генераль директоры Роман Карманов, Россия Федерациясе Дәүләт Думасы һәм Татарстан Республикасы Дәүләт Советы депутатлары, Россиянең 8 регионы мәдәният министрлыклары җитәкчеләре, шулай ук Татарстан ведомстволары һәм министрлыклары, ведомство буйсынуындагы учреждениеләр, Татарстан Республикасы муниципаль районнарының мәдәният идарәләре җитәкчеләре, танылган мәдәният эшлеклеләре катнашты.
Коллегиягә Татарстан Республикасында Милли мәдәниятләр һәм традицияләр елына багышланган тармак күргәзмәсе тәкъдим ителде, анда ведомство һәм муниципаль учреждениеләрнең, дәүләтнеке булмаган секторның әһәмиятле проектлары тәкъдим ителде.
Татарстан Республикасы Мәдәният министрлыгы коллегиясе утырышы барышында ведомствоның 2022 елдагы эшчәнлегенә йомгак ясалды, Татарстан Республикасының федераль программаларда катнашуы һәм «Мәдәният» милли проектын гамәлгә ашыру нәтиҗәләре билгеләнде, ведомствоның 2023 елга эшчәнлек перспективалары һәм бурычлары билгеләнде, яңа мәдәни проектлар каралды.
Татарстан Республикасы мәдәният министры Ирада Әюпова үз докладында үсеш потенциалының бер юнәлеше - мәдәният объектларын туристлык маршрутларына кертү дип билгеләп үтте.
Коллегия эшенә йомгак ясап, Татарстан Республикасы Президенты Рөстәм Миңнеханов зур федераль ярдәмөчен һәм республика мәдәниятен үстерү мәсьәләләренә игътибарлары өчен рәхмәтен белдерде.
Шулай ук ул Президент мәдәни инициативалар фонды ярдәмендә проектларны гамәлгә ашыру эшен дәвам итәргә өндәде. Рөстәм Миңнеханов «Пушкин картасы» дигән мөһим проектны аерым билгеләп үтте: «Бик яхшы проект барлыкка килде. Аны алга таба да этәрергә, ата-аналар, җәмәгатьчелек белән активрак хезмәттәшлек итәргә кирәк. Бу безнең яшьләрне тәрбияләү мәсьәләсе».
Татарстан Республикасы Президенты искә төшергәнчә, 2023 ел Татарстанда Милли мәдәниятләр һәм традицияләр елы дип игълан ителде, ул милли колоритның уникальлеген популярлаштыру өчен импульс булырга тиеш.
Татарстан Республикасы Президенты сүзләренчә, теләсә кайсы тармакның уңыш нигезе профессиональ кадрлар. Бүген мәдәният һәм сәнгать өлкәсендә белгечләрне әзерләү һәм квалификацияләрен күтәрү үзәге дип танылган Казан дәүләт мәдәният институты санала, анда укыту процессында укытуның традицион һәм инновацион ысулларын берләштерәләр.
Татарстан Республикасы Мәдәният министрлыгы коллегиясенең киңәйтелгән утырышы танылган артистларны, мәдәният эшлеклеләрен, учреждение хезмәткәрләрен, педагогларны дәүләт бүләкләре белән бүләкләү белән тәмамланды.