Свердловск өлкәсендә Татарстан киносы көннәре узачак
12-20 февральдә Свердловск өлкәсендә Татарстан киносы көннәре узачак. Татар киносы көннәре Свердловск өлкәсендә 2019 елда оештырылган иде.
Оештыручылар - ТР Мәдәният министрлыгы һәм «Татаркино» мәдәният учреждениесе. Барлык фильмнар да татар телендә рус субтитрлары белән күрсәтеләчәк.
Атна дәвамында тамашачылар Татарстан режиссерлары иҗаты белән таныша алачак.
Афишада дүрт кинокартина бар: «Әпипә» (реж. Илшат Рәхимбай) "Сөмбел" (реж. Рамил Фазлыев, Рәшит Маликов) һәм Илдар Ягъфәровның «Байгал» һәм «Исәнмесез» фильмнары.
Татарстан киносы көннәре 12 февральдә 13:00 сәгатьтә Екатеринбург шәһәренең «Кино йорты» кинотеатрында «Әпипә» фильмы белән ачыла. Ачылу тантанасында «Татаркино» директоры, продюсер Миләүшә Айтуганова, «Әпипә» фильмындагы рольләрне башкаручылар - Татарстан Республикасының атказанган артисты Рөстәм Гайзуллин һәм татар эстрадасының популяр җырчысы Дилә Нигъмәтуллина катнаша.
Татарстан киносы көннәрен ябу тантанасы Серов шәһәренең «Родина» кинотеатрында узачак.