Татарстан Республикасы Милли музеенда Әниләр көненә багышланган «Мин аналарга дан җырлыйм» дигән чара узачак
РФ Президентының 1998 елдагы Указы нигезендә, Әниләр көне ноябрьнең соңгы якшәмбесендә билгеләп үтелә. Бәйрәмнең максаты – хатын-кызларга карата сакчыл мөнәсәбәт, гаилә традицияләрен саклау, әнинең һәр кеше тормышындагы әһәмиятен билгеләп үтү. Әниләр көне ел саен уздырыла торган бәйрәмгә әверелде. Хатын-кызга хөрмәт һәрвакытта да зур булган, чөнки ул - яңа тормыш чыганагы.
25 ноябрь көнне Татарстан Республикасы Милли музеенда Әниләр көненә багышланган «Мин аналарга дан җырлыйм» дигән чара узачак.
11.00 сәгатьтә «Өйгә таба юл» дигән мәчеләр күргәзмә-акциясе үз эшен башлап җибәрә, аны «Зоозабота» хәйрия оешмасы үткәрә. Күргәзмәдә мәчеләр белән танышырга, аларны тәрбияләү үзенчәлекләрен белергә һәм яңа дус табарга мөмкин. Программада - ветеринария табибы чыгышы, рәсем ясау, мехенди, аквагрим буенча мастер-класслар, фото һәм рәсем күргәзмәләре. Шулай ук приютта яшәүчеләр өчен азык җыю чарасы оештырылачак.
Татарстан Республикасы Милли музее заллары буенча теләге булган һәркем өчен «100 адым элек» дигән мавыктыргыч квест-уен үткәреләчәк. Конференц-залда 12.00 сәгатьтән башлап татар хоры концерты узачак, 13.00 сәгатьтә караоке яратучылар өчен «Җырлыйк, дуслар» интерактив чарасы була.
Көн дәвамында кунаклар өчен «Татарстан – безнең уртак йортыбыз» интерактив мәйданчыгы эшләячәк, чүпрәк курчаклар, керамик эшләнмәләр ясау буенча мастер-классларда катнашырга мөмкин.
Белешмәләр өчен телефон: +7 (843) 292-89-84