“Әкият” курчак театрында Фәнис Яруллин әсәре буенча премьера була
13 декабрьдә “Әкият” Татар дәүләт курчак театрында Фәнис Яруллин әсәре буенча “Йолдыз тапкан кыз” спектакле премьерасы була.
Спектакль “Бердәм Россия” партиясенең “Театр - балаларга” федераль программасы кысаларында тормышка ашырыла.
Спектакльнең режиссеры - Россия Федерациясенең һәм Татарстан Республикасының атказанган сәнгать эшлеклесе Илдус Зиннуров, рәссамы - «Алтын битлек» милли театраль премиясе номинанты Татьяна Мельникова (Санкт-Петербург), композиторы - Татарстан Республикасының атказанган сәнгать эшлеклесе Мәсгүдә Шәмсетдинова (АКШ), хореограф – Татарстан Республикасының атказанган сәнгать эшлеклесе Гүзәл Маннапова, аранжировка – Татарстан Республикасының атказанган сәнгать эшлеклесе Юрий Чаплин.
“Бу әсәрне без очраклы гына сайламадык. Спектакльне Татарстанның халык шагыйре Фәнис Яруллинның якты истәлегенә багышлыйбыз. Аның тууына быел 80 ел тулды”, – диде спектакльнең режиссеры Илдус Зиннуров.