Ирина Бокова: «Татарстанлылар үз тарихы белән горурлана һәм тарихи мирасны күз карасыдай саклый»
ЮНЕСКОның Генераль директоры Ирина Бокова үзенең Төркия Республикасына беренче визиты вакытында 2015 елның 5 гыйнварында ТӨРЕКСОЙның Әнкарәдагы штаб-квартирасында булды. Ирина ханым Төркия башкаласына әлеге мәмләкәтнең чит ил эшләре министры Мәүлет Чавушоглу чакыруы буенча килде һәм Төркия Республикасы дипломатик миссияләре башлыкларының 7 нче конференциясендә чыгыш ясады. Анда Төркия Президенты Тайип Эрдоган катнашты.
Ирина Бокова ТӨРЕКСОЙның Генераль секретаре Дюсен Касеинов белән очрашты. Очрашу вакытында Ирина ханым узган елның августында Татарстанда булуы, Болгар тарих-архитектура комплексының ЮНЕСКО бөтендөнья мирасы исемлегенә кертелүе турында сертификат тапшыруы, татарстанлыларның үз тарихы белән горурлануы, тарихи мирасны кадерләп саклавы турында сөйләде.
Татарстан Республикасы Мәдәният министрлыгының Матбугат хезмәте